راستی وێنەی داواکاری گشتی ئۆکرانیا
K24 - هەولێر:
هەواڵی جەنگی ئۆکرانیا سەرنجی هەمووانی بەلای خۆیدا راکێشاوە و لەو نێوەندەشدا وێنەی خانمێک بڵاوکرایەوە کە دەگوترا داواکاری گشتییە و ئەمەش دەنگدانەوەی زۆری بەدوای خۆیدا هێنا.
لەگەڵ بڵاوبوونەوەی وێنەکە بانگەشەی ئەوە کرا کە ئەو خانمەی لە وێنەکەدایە داواکاری گشتی ئۆکرانیایە و وێنەکەش چەندین کۆمێنتی جیاوازی لەخۆی کۆکردەوە.
بەشێكی زۆربەی کۆمێنتەکان بە گاڵتەوە باس لە جوانی خانمە ئۆکرانیەکە دەکەن و دەڵێن با بچینە ئۆکرانیا و رزگاری بکەین.
بە گوێرەی ئاژانسی فرانس پرێس، داواکاری گشتی ئۆکرانیا خانمێکە بەناوی ئیرینا ڤێندیکۆتۆڤا، بەڵام ئەو خانمەی لە وێنەکەدایە، "ناتالیا بوکلونسکایا"ـیە کە داواکاری گشتی پێشووی نیمچە دوورگەی قرمە کە ساڵێ 2014خرایە سەر رووسیا.
ناتالیا بوکلونسکایا بەهۆی روخسارە سەرنجراکێشەکەیەوە لە تۆڕە کۆمەڵایەتیەکان هەوادارێکی زۆری پەیدا کردووە بە تایبەتی لە وڵاتی ژاپۆن کە چەند کارەکتەرێکی هاوشێوەی ئەو لە مانگا ئەنیمیەکاندا دروست کراوە.
H.H