سەرۆکایەتی ئەنجوومەنی وەزیران داوای لێکۆڵینەوەی نێودەوڵەتی لە هێرشەكه‌ی سەر هەولێر دەکات
K24 – هه‌ولێر:
سه‌رۆكایه‌تی ئه‌نجومه‌نی وه‌زیرانی هه‌رێمی كوردستان له‌باره‌ی هێرشه مووشه‌كییه‌كه‌ی هه‌ولێر له راگه‌یه‌ندراوێكدا ئاشكرای كرد، شوێنی بە ئامانجکراو، شوێنێکی مەدەنی بووە و ئەم پاساوە تەنیا بۆ شاردنەوەی ئەم تاوانە قێزەونەیە و پروپاگەندەی ئەنجامدەرانی هێرشەکەش دوورە لە راستییەوە.
له راگه‌یه‌ندراوكه‌دا هاتووه: ئەمە چەندین جارە ئێران ئەم دەستدرێژییانە دووبارە دەکاتەوە و بێدەنگی کومەڵگەی نێودەوڵەتیش بەرامبەر بەم هێرشە ترسنۆکانە، رێگه‌خۆشکەر دەبێت بۆ بەردەوامیی ئەم جۆرە تاوانانە.
ده‌قی راگه‌یه‌ندراوه‌كه‌ی سه‌رۆكایه‌تی ئه‌نجومه‌نی وه‌زیران:
سەبارەت بە هێرشی ترسنۆکانەی بەرەبەیانی رۆژی 2022/3/13ی سەر هەولێر، کە گوایە بە پاساوی لێدانی بنکەیەکی ئیسرائیلی نزیك کونسوڵخانەی ئەمه‌ریکا بووە، رایدەگەیەنین شوێنی بە ئامانجکراو، شوێنێکی مەدەنی بووە و ئەم پاساوە، تەنیا بۆ شاردنەوەی ئەم تاوانە قێزەونەیە و پروپاگەندەی ئەنجامدەرانی هێرشەکەش دوورە لە راستییەوە.
ئەمە چەندین جارە ئێران ئەم دەستدرێژیانە دووبارە دەکاتەوە و بێدەنگی کومەڵگەی نێودەوڵەتیش بەرامبەر بەم هێرشە ترسنۆکانە، رێگه‌خۆشکەر دەبێت بۆ بەردەوامیی ئەم جۆرە تاوانانە.
داوا لە نەتەوە یەکگرتووەکان و ویلایه‌تە یەکگرتووەکانی ئەمه‌ریکا و یەکێتی ئەوروپا و جامیعەی عەرەبی و حکومەت و پەرلەمانی عێراق و حکومەتی ئێران دەکەین، بەپەلە لێکوڵینەوە لەم هێرش و تۆمەتە بێ بنەمایانە بکەن و سەردانی شوێنی بە ئامانجکراو بکەن و راستیيەکان بۆ رای گشتی جیهان ئاشکرا بکەن و هەڵوێستی توند بەرامبەر بەم هێرشانە بگرنەبەر.
سەرۆکایەتی ئەنجوومەنی وەزیران