گەڕێکی دیکەی دانوستانی نێوان رووسیا و ئۆکرانیا دەستپێدەکات
K24 – هەولێر
بڕیارە ئەمڕۆ گەڕێکی دیکەی دانوستانی نێوان مۆسکۆ و کیێڤ بۆ گفتوگۆکردن لەسەر کێشەکانیان بەڕێوەبچێت.
دیمیتری پێسکۆف، وتەبێژی کرملن رایگەیاند، ئەمڕۆ 14/3/2022، گەڕێکی دیکەی دانوستانەکانی نێوان مۆسکۆ و کیێڤ دەستپێدەکات.
پێشتر چەند جارێک کۆبوونەوە لەنێوان شاندی رووسیا و ئۆکرانیا ئەنجامدراوە، دوایین گفتوگۆشیان 10ی ئەم مانگە کۆبوونەوەی نێوان سێرگی لاڤرۆڤ، وەزیری دەرەوەی رووسیا و دیمتری کۆلیبا، وەزیری دەرەوەی ئۆکرانیا بوو ، بە نێوەندگیری مەولود چاوشئۆغڵو وەزیری دەرەوەی تورکیا لە پەراوێزی کۆڕبەندی دیپلۆماتی لە شاری ئانتاڵیای تورکیا.
گفتوگۆکانی نێوان رووسیا و ئۆکرانیا، تائێستا هیچ ئەنجامێکی نەبووە، بەڵام هەردوولا ئامادەیی خۆیان دەربڕیوە بۆ بەردەوامیدان بە کۆبوونەوەکانی نێوانیان.
لە 24/2/2022، سوپای رووسیا هێرشی بۆ سەر ئۆکرانیا دەستپێکرد، تائێستا چەند شار و ناوچەیەکی ئەو وڵاتەی کۆنترۆڵ کردووە و هەوڵەکانی بۆ کۆنترۆڵکردنی کیێڤی پایتەخت چرکردووەتەوە.