دوو تێرمیناڵی گەورەترین فڕۆکەخانەی رووسیا بەشێوەیەکی کاتیی داخران

K24 - هەولێر:

دوو تێرمیناڵی فڕۆکەخانەی شێرێمێتيێڤۆ کە گەورەترین فڕۆکەخانەی رووسیایە، بەشێوەیەکی کاتیی داخران و پرۆژە نوێکانی وەبەرهێنانیشی راگیران.

لە راگەیەندراوێکدا کە لەلایەن فڕۆکەخانەی شێرێمێتيێڤۆوە بڵاوکراوەتەوە، ئاماژە بەوە کراوە کە بەهۆی سزاکانەوە ژمارەی گەشتیار کەمی کردووە، بەو هۆیەشەوە تێرمیناڵەکانی E و D بەشێوەیەکی کاتیی داخراون.

لە راگەیەندراوەکەدا ئاماژە بەوەش دراوە، تا کاتی ئاساییبوونەوەی ژمارەی گەشتەکان فڕگەی سێیەمی فڕۆکەخانەکە دادەخرێت.

بەهۆی سزاکانەوە، ئەمریکا و یەکێتیی ئەورووپا بڕیاریاندا، ئاسمانی وڵاتەکانیان بەڕووی فڕۆکەکانی رووسیادا دابخەن و لە بەرامبەریشدا، رووسیا بڕیاری دا هەمان سزا بەسەر ئەو وڵاتانەدا بسەپێنێت.

هاوکات بەهۆی مەترسی دەستبەسەرداگرتنی فڕۆکە رووسیاییەکان لەلایەن کۆمپانیا خۆرئاواییەکانەوە، ژمارەیەک کۆمپانیای فڕۆکەوانیی و گەشتیاریی لە رووسیا گەشتە نێودەوڵەتییەکانیان راگرت.

سەرچاوە: AA