ئانۆ جه‌وهه‌ر: ته‌نیا ده‌توانی به‌ كورد بڵێی كوردستان ته‌نیا هی ئێوه‌ نییه‌

kurdistan24.net

K24 – هه‌ولێر:

ئانۆ جه‌وهه‌ر، وه‌زیری گواستنه‌وه‌ و گه‌یاندنی حكومه‌تی هه‌رێمی كوردستان رایگه‌یاند، ته‌نیا له‌ كوردستاندا و به‌ كورد ده‌توانی بڵێی كوردستان ته‌نیا هی ئێوه‌ نییه‌ و هی هه‌موومانه‌، به‌ هیچ نه‌ته‌وه‌یه‌كی دیكه‌ی زۆرینه‌ له‌ ناوچه‌كه‌دا ناتوانی ئه‌وه‌ بڵێی.

ئه‌مڕۆ له‌ هه‌ولێر، ئاشووری سریان كلدانه‌كان ئاهه‌نگی سه‌ری ساڵ و جه‌ژنی ئه‌كیتۆیان گێڕا و پێیان نایه‌ ساڵی 6772ی ئاشووریی بابلییه‌وه‌.

به‌و بۆنه‌یه‌وه‌ ئانۆ جه‌وهه‌ر به‌ زمانی ئینگلیزی وته‌یه‌كی پێشكه‌ش كرد و تێیدا ستایشی پێكه‌وه‌ژیانی له‌ هه‌رێمی كوردستان كرد.

ئانۆ جه‌وهه‌ر گوتی: ئه‌م پێكه‌وه‌ژیانه‌ی هه‌مووان له‌ كوردستان به‌رهه‌می سینگفراوانی و سیاسه‌تی ژیرانه‌ و حیكمه‌تی سه‌ركردایه‌تییه‌كه‌مانه‌ و سه‌دان ساڵه‌ كورد و سه‌رجه‌م پێكهاته‌ ئایینی و نه‌ته‌وه‌یی و مه‌زهه‌بییه‌كانی دیكه‌ به‌یه‌كه‌وه‌ ده‌ژین.

گوتیشی: مه‌سرور بارزانی، سه‌رۆكی حكومه‌تی هه‌رێمی كوردستان روانگه‌یه‌كی فراوان و قووڵی بۆ پێكه‌وه‌ژیان هه‌یه‌ و وه‌زیرێكی كابینه‌كه‌ی كه‌ ئایدن مه‌عرووف، كه‌سایه‌تی توركمانییه‌ ته‌رخانكردووه‌ بۆ كاروباری پێكهاته‌كان.

ئه‌وه‌شی گوت: كوردستان شایه‌نی زۆر شتی زیاتره‌ و گرنگه‌ زۆرتر له‌ لایه‌ن دۆسته‌كانمانه‌وه‌ پشتیوانی لێ بكرێت.