پێنتاگۆن: هێزەکانی رووسیا بە تەواوەتی لەم دوو ناوچەیە کشاونه‌تەوە
K24 - هەولێر:
كاربه‌ده‌ستێكی باڵای وەزارەتی بەرگریی ئەمریکا (پێنتاگۆن) رایگەیاند، سەرجەم ھێزە رووسییەکان لە چواردەوری کیێڤی پایتەخت و شاری چێرنیگیڤ کشاونەتەوە.
لە لێدوانێکیدا بۆ گرووپێک رۆژنامەوان كاربه‌ده‌ستێكی باڵای پێنتاگۆن، زانیاری لەسەر جەنگی رووسیا-ئۆکرانیا دا و گوتی: "بەپێی هەڵسەنگاندنەکانمان، ھێزەکانی رووسیا لە چواردەوری کیێڤی پایتەخت و شاری چێرنیگیڤ، بە مەبەستی دووبارە خۆ رێکخستنەوە لەسەر خاکی بێلاڕووس و رووسیا، بە تەواوەتی لەم دوو ناوچەیە کشاونه‌تەوە".
ئه‌و كاربه‌ده‌سته ئاشکرایکرد کە ئەو یەکە سەربازییانەی کە لەو دوو ناوچەیە کشاونەتەوە لە 20 بەتالیۆن پێکھاتوون و تا ئێستا رووسیا زیاتر لە 80 بەتالیۆنی لە ناو خاکی ئۆکرانیادا ماوە.
ئه‌مه جگه له‌وه‌ی زانیاری وردی لەسەر ژمارەی ئەو سەربازانەی کە کشاونەتەوە نەدا و باسی لەوە کرد کە ھەر بەتالیۆنێکی رووسی لەنێوان 800 بۆ ھەزار سەربازن.
كاربه‌ده‌سته‌كه‌ی پێنتاگۆن هه‌ڵسەنگاندنی بۆ بۆردومانکردنی كۆگاكانی سووتەمەنی ئۆکرانیا لەلایەن رووسیاوە کرد و ئاشكرایكرد، ئەمریکا و ھاوبەشەکانی کار لەسەر گەیاندنی سووتەمەنی بۆ ئۆکرانیا دەکەن.
ئەوەشی خستەڕوو کە ئۆکرانیا ئۆپەراسیۆنە بەرگرییەکانی خێرا کردووە و رایگەیاند ئەو ھاوکارییەی چەند رۆژی رابردوو کە بە بڕی 100 ملیۆن دۆلار بۆ مووشەکی جاڤلین دابین كرابوو، مه‌به‌ست لێی دابینکردنی پێداویستیی خێرای سوپای ئۆکرانیا لە دۆنباس بوو.
AA