جەنگی رووسیا و ئۆکرانیا نرخی نەوت زیاتر بەرزدەکاتەوە

K24 - هەولێر

بە هۆی مەترسییەکان لە زیاتر درێژەکێشانی جەنگی رووسیا و ئۆکرانیا، و ئەگەرەکان بە سەپاندنی سزای زیاتر بەسەر مۆسکۆ، نرخی نەوت لە مامەڵەکانی یەکەم رۆژی هەفتەیدا بە رەنگی سەوز کرایەە و بە شیوەیەکی بەرچاو بەرزبووەوە.

لەسەر ئاستی مامەڵەکاندا نرخی بەرمیلێک نەوتی خاوی برێنت لە گرێبەستەکانی داهاتووی بە رێژەی 1.3% بۆ 113.20 دۆلار بەرزبووەوە، هەروەها نرخی بەرمیلێک نەوتی رۆژئاوای تێکساسیش لە گرێبەستەکانی داهاتووی بە رێژەی 0.9% بۆ 107.93 دۆلار بەرزبووەوە.

هەروەها نرخی هەردوو جۆر نەوتی خاویش بەر لە جەژنی هەڵسانەوە لە رۆژی پێنجشەممەوە بە رێژەی 2.5% بەرزبوونەتەوە، هۆکاری ئەو بەرزبوونەوە بەرچاوەش، ئەگەرەکانە بە سەپاندنی سزای زیاتر بەسەر مۆسکۆ لەلایەن یەکێتی ئەوروپاوە، کە پێشبینی دەکرێت ئەوروپا هاوردەکردنی نەوتی رووسیا قەدەغە بکات.