نێچيرڤان بارزانى جه‌ژنا سه‌رسالا ئێزدييان پيرۆز دكه‌ت
K24- هه‌ولێر:
د په‌یامه‌كێ ده، نێچیرڤان بارزانی، سه‌رۆكی هه‌رێما كوردستانێ پیرۆزباهیا جه‌ژنا سه‌رسالا نو یا ئۆلا ئێزدییان له ته‌ڤایا خوشك و برایێن ئێزیدی پیرۆز ده‌كه‌ت و وان پشتڕاست ده‌كه‌ت، كو هندى ره‌ڤاندييه‌ك ئێزدى مابيت، دێ هه‌ولێن خوه ژبۆ رزگاركرنا وان و دياركرنا چاره‌نڤيسا وندايان به‌رده‌وام بكن.
ئه‌ڤ ژی ته‌كستا په‌یاما پیرۆزباهیا نێچیرڤان بارزانییه ژبۆ جه‌ژنا سه‌رساڵا نو یا ئێزدیان:
جه‌ژنا سه‌رسالا ئێزدييان ـ چارشه‌مبوا سۆر ـ ب گه‌رمى ل هه‌مى خوشك و برايێن ئێزیدى ل كوردستانێ و ل هه‌ر ده‌را جيهانێ بن، پيرۆز دكه‌م، هيڤيدارم جه‌ژنه‌كا ته‌نا و ئارام ده‌رباس بكه‌ن و هه‌رسال ب خێر و خۆشى ڤه‌گه‌ڕيت.
د ڤێ جه‌ژنێدا جاره‌كا دی هه‌مى خوشك و برايێن ئێزیدى پشتڕاست دكه‌ين كو هندى ره‌ڤاندييه‌ك ئێزدى مابيت، هه‌ولێن مه يێن ژبۆ رزگاركرنا وان و دياركرنا چاره‌نڤيسا وندايان دێ به‌رده‌وام بن، هه‌روه‌سا هه‌مى پشته‌ڤانيێ ل مافێن ئێزدييان، ئاڤه‌دانكرنا جهێن وان و مسۆگه‌رييا ئارامى و ته‌ناهييا وان دكه‌ين، ژبۆ ڤێ يه‌كێ ژى به‌رده‌وام دگه‌ل ئالى يێن عێراقى و نێڤده‌وله‌تى كار دكه‌ين.
جه‌ژنا ئيسال ژى مخابن د ده‌مه‌كێدا تێت، كو هێشتا هژماره‌كا مه‌زن یا خوشك و برايێن مه يێن ئێزیدى ژيانا خۆ ل كه‌مپان ده‌رباس دكه‌ن. ئه‌م ب رێز و پێزانين ل خۆڕاگريا ئێزدييان دنێڕين و هيڤيدارين جه‌ژن و هه‌لكه‌فتنێن بێن، د ره‌وشێن باشتردا ڤه‌گه‌ڕن و هه‌مى ئێزدى ب ئارامى ڤه‌گه‌ڕيابن سه‌ر وار و جهێن خۆ يێن ته‌نا و ئاڤه‌دانكرى.
هه‌ر ب ڤێ هه‌لكه‌فتێ، جاره‌كا دى خوشك و برايێن خۆ يێن ئێزیدى و هه‌مى ئۆل و نه‌ته‌وه و پێكهاته‌یێن گه‌لێ كوردستانێ پشتڕاست دكه‌ين كو وه‌ك هه‌رتم كوردستان دێ وارێ لێبوورين، هه‌ڤقه‌بوولكرن و پێكڤه‌ژيانه‌كا ئاشتيانه مينيت و ئه‌م هه‌مى پێكڤه دێ پارێزه‌رێن ڤێ كولتوورێ و مافێن ده‌ستوورى يێن گه‌لێ كوردستانێ بين.
سه‌رسالا هه‌ميان پيرۆز بيت و هه‌ر شاد بن.
نێچيرڤان بارزانى
سه‌رۆكێ هه‌رێما كوردستانێ
2022/4/19
H.B