خەڵکی بۆکان دژی لکاندنی قەرەگۆلن بە میاندواو

K24 - هه‌ولێر:

نوێنەری بۆکان لە پەرلەمانی ئێران لە نامەیەکدا بۆ وەزیری ناوخۆی ئەو وڵاتە داوای کرد جیاکردنەوەی گوندی قەرەگۆل لە بۆکان و لکاندنی بە شاری میاندواو پەسند نەکات.

ئەنوەر حەبیبزادە نوێنەری شاری بۆکان لە پەرلەمان ئێران لە نامەکەیدا بۆ وەزیری ناوخۆی ئەو وڵاتە باس لە لێکەوتە سیاسی، کۆمەڵایەتی، فەرهەنگی و ئابوورییەکانی ئەو داوایە لە ئەگەری پەسندکردنی دەکات.

وەک لە نامەکەی حەبیبزادەدا هاتووە، ئەنجوومەنی شار و گوندەکانی بۆکان، پیاوماقووڵان و کەسایەتییە ئایینەییەکان بە تەواوی دژی ئەو داوایەن.

پێشتر نوێنەری شاری میاندواو داوای کردبوو گوندی قەرەگۆل لە سنووری ئیداری بۆکان جیا بکرێتەوە و بخرێتە سەر سنووری ئیداری میاندواو.

قەرەگۆل کە زۆرینەی دانیشتووانی کوردن، 30 کیلۆمەتر لە ناوەندی میاندواو (زۆرینەی دانیشتووانی تورکن) و هەشت کیلۆمەتر لە شارەدێی سیمینەی سەر بە بۆکان دوورە.  

حەبیبزادە دەڵێ بە هۆی جیاوازی نەتەوەیی، فەرهەنگی و ئایینی قەرەگۆل لەگەڵ دانیشتووانی میاندواو "ئەو کارە پێکدادانی نەتەوەیی، کۆمەڵایەتی و سیاسی لێ دەکەوێتەوە".

قەرەگۆل دەکەوێتە نێوان شارەکانی بۆکان و میاندواو و لە رووی کشتوکاڵییەوە زۆر گرنگە، زەوی بە پیت و بەرەکەتی هەیە و بە هۆی بوونی گۆلێکی گەورەش، بووتە ناوەندێکی گەشتیاریی ناوچەکە.