سیروان بارزانی: پێشمه‌رگه ئۆپراسیۆنێكی دژی چه‌كدارانی داعش ئه‌نجامدا
K24- هه‌ولێر:
سەرپەرشتیاری میحوەری گوێڕ – مه‌خموور ئاشكرای ده‌كات، له ناوچه‌ی بۆشایی ئه‌منی به هاوبه‌شی له‌گه‌ڵ سوپای عێراق ئۆپراسیۆنێك دژی چه‌كدارانی داعش ئه‌نجامدرا و تێیدا دوو چه‌كدار كوژران.
سیروان بارزانی، سەرپەرشتیاری میحوەری گوێڕ – مه‌خمووری هێزه‌كانی پێشمه‌رگه‌ی كوردستان له لاپه‌ڕه‌ی تایبه‌تی خۆی له تۆڕی كۆمه‌ڵایه‌تی فه‌یسبووك رایگه‌یاند، بەرەبەیانی ئه‌مڕۆ 15ـی ئایار/ مایۆی 2022 ھێزه‌كانی پێشمەرگە، میحوەری 6، ئۆپەراسیۆنێکيان ئەنجامدا.
سیروان بارزانی راشیگه‌یاند، ئه‌م ئۆپراسیۆنه سه‌ربازییه لەبۆشایی ئه‌منی نێوانی ھێزی پێشمەرگە و سوپای عێراق لە بەشی باکووری چیای قەرەچووغ دژ بە تێرۆریستانی داعش ئه‌نجامدرا.
هه‌روه‌ها سەرپەرشتیاری میحوەری گوێڕ – مه‌خمووری هێزه‌كانی پێشمه‌رگه‌ی كوردستان ئه‌وه‌شی خسته‌ڕوو، لەکاتی کێوماڵکردنی 3 ئەشکەوت و تونێڵی چه‌كدارانی داعش، رووبەڕووبوونەوە روویداو لە ئەنجامدا پێشمەرگەیەک بەسووکی برینداربوو و 2 تێرۆریستیش کوژران.
سیروان بارزانی ئاماژه‌ی به‌وه‌شكرد، دوای كۆتایی هاتنی ئۆپراسیۆنه‌كه چەندین کەلوپەلی تێرۆریستان کەوتنە دەستی هێزه‌كانی پێشمەرگەی كوردستان.