مه‌سرور بارزانی پێگه‌ی هه‌رێمی كوردستان به‌هێز ده‌كات
K24 - هه‌ولێر:
هەوڵەکانی سەرۆکی حکومەت و کابینەی نۆیەم بۆ کرانەوەی هەرێمی کوردستان و بەهێزکردنی پێگەی کوردستان لەسەر ئاستی جیهان بەردەوامە و لەماوەی کارکردنی کابینەی نۆیەمدا هەرێمی کوردستان زۆرترین دیدار و کۆبوونەوەی دیپلۆماسی و سەردانی شاندە نێودەوڵەتییەکانی بەخۆوە بینیووە.
لە دەستپێکی کارکردنی کابینەی نۆیەمی حکومەتی هەرێمی کوردستان و دەستبەکاربوونی مەسرور بارزانی وەکو سەرۆکی حکومەت، لە راگەیاندنی کارنامەی کابینەکەی جەختی لە پتەکردنی پەیوەندییەکانی کوردستان لەگەڵ وڵاتانی جیهان و فراوانکردنی پەیوەندییە نێودەوڵەتییەکان کاری لەپێشینەی حکومەتە.
لە کارنامەی کابینەی نۆیەمدا هاتووە، ئامانج لە بەهێزکردنی پەیوەندییەکان ئەوەیە هەرێمی کوردستان ببێتە هاوبەشێکی بەهێز و متمانەپێکراوی جیهان و پەیوەندییەکی ئاشتیانە لەگەڵ دراوسێکانی دەکاتە کاری لە پێشینەی و کاردەکات بۆ ئەوەی لە سەرانسەری جیهان رێز لە پێگەی هەرێمی کوردستان بگیرێت.
ئامانجەکانی کابینەی نۆیه‌می حكومه‌تی هه‌رێمی كوردستان لە پتەوکردنی پەیوەندییە نێودەوڵەتییەکان:
- فراوانکردنی پەیوەندییە نێودەوڵەتییەکان کاری لەپێشینەی حکوومەتە.
- لە دەرەوە پەیوەندییە دیپلۆماسییەکان بەهێز دەکرێن.
- کوردستان ناوەندی گفتوگۆی گرنگ بێت لە بارەی ئاسایش و بازرگانییەوە.
- دروستکردنی هەلومەرج بۆ وەبەرهێنەرە بیانییەکان لە کوردستان
- بنیاتنانی کوردستانێکی پارێزراو و میواندۆست و کراوە بەڕووی جیهاندا
- بەدەستهێنانی پشتگیرییکردنی هاوپەیمانان بۆ کوردستان
- زیادکردن و هەمەجۆرکرنی گەشتیاران
مەسرور بارزانی هەمیشە رایگەیاندووە، پابەندبوونی حکوومەت بە بنیاتنانی کوردستانێکی بەهێز و گەشەسەندوو زۆر گرنگە بۆ سەقامگیرییەکی درێژخایەن لە ناوچەکەدا و هەروەها گرنگیشە بۆ ئەوەی نیشانی بدەن، کە هەرێمی کوردستان رێزی لێ دەگیرێت.
سەردانەکانی ئەمدوایەی سەرۆکی حکومەتی هەرێمی کوردستان بۆ ئیمارات و بەریتانیا و قەتەر دەرخەری ئەو راستییە، کە ئێستا پێگەی هەرێمی کوردستان لە هەموو کات زیاتر پێگەی نێودەوڵەتی بەهێزترە و حکومەتی هەرێمی کوردستان خۆی وەک هاوبەشێکی نێودەوڵەتی گرنگ لە رووی بازرگانی، ئابووری و سەقامگیریی سەلماندووە. لە هەموو دیدارەکانیش وڵاتی جیهان دووپات لە رۆڵی کارا و پێویستی هەرێمی کوردستان لە ناوچەکە دەکەنەوە.
