لە سلێمانی خاوەن رێستورانتێک بریندار کرا

K24 – سلێمانی:

لە گەڕەکی بەختیاری شاری سلێمانی تەقە لە خاوەن رێستورانتێک کرا و بریندار کرا.

پەیامنێری کوردستان24 لە سلێمانی رایگەیاند: "درەنگانی شەوی رابردوو کەسێک لەسەر ماتۆرسکیلەکەی لە گەڕەکی بەختیاری سلێمانی تەقەی لە خاوەنی رێستورانتێک کرد و برینداری کرد".

گوتیشی: "بریندارەکە بۆ چارەسەر گەیەندراوەتە نەخۆشخانەی شار و دەستبەجێ نەشتەرگەری بۆ کراوە".

بەگوێرەی زانیارییەکانی پەیامنێرانی کوردستان24 لە سلێمانی، ئەو کەسە ویستویەتی خاوەن رێستورانتەکە بکوژێت، بەڵام هۆکارەکە نەزانراوە.

ئەوەش زانراوە، ئەو خاوەن رێستورانتە خەڵکی باکووری کوردستانە و لە سلێمانی کاری کردووە، دوای رووداوەکەش هێزە ئەمنییەکان بۆ لێکۆڵینەوە گەیشتوونەتە شوێنی رووداوەکە.