قاچاخچییەک خێزانێکی هەولێر لەناو رووبارێک جێدەهێڵێت

K24 - زاخۆ

خێزانێکی 9 کەسی دانیشتووی هەولێر، لەگەڵ قاچخچییەک بەرەو تورکیا بەڕێدەکەون، لەناو رووباری هیزل کە دەکەوێتە ناوچەی سنووری هەرێمی کوردستان و تورکیا جێیان دەهێڵێت.

ئیسلام یوسف، پەیامنێری کوردستان24 لە زاخۆ رایگەیاند: "دوای 4 کاتژمێر مانەوەی ئەو خێزانە لەناو رووبارەکە لەلایەن هێزەکانی ئاسایش و بەرگری شارستانی زاخۆ رزگار کران".

پەیامنێرمان ئاماژەی بەوەشکرد: "ئەو خێزانە ویستویانە بە قاچاخ ئاودیوی وڵاتی تورکیا بن، بەڵام قاچاخچی فێڵی لێکردون، چەند ئەندامێکی خێزانەکە ژن و منداڵن".

راشیگەیاند: "باری تەندروستی ئەندامانی خێزانەکە باشە، بەڵام بەهۆی مانەوە لەناو ئاو سەرمایان بووە، دوای رزگارکردنیان لە ناوچەی سنووری گواستراونەتەوە زاخۆ و لە شوێنێکی ئارام دان".