ئێران و تورکیا ده‌یانه‌وێت عێراق بخنكێنن
K24 - بەغدا
بە هۆی گرتنەوەی تەواوی رێوڕەوەکانی ئاوی روباری فوڕات، لە لایەن وڵاتی ئێرانەوە هیچ بڕە ئاوێک ناڕێژێتە ناو خاکی عێراق، هەروەها وڵاتی تورکیا 80% ئاوی روباری دیجلە لە بەنداوی ئەلیسۆ گلدەداتەوە، ئەمانەش وایکردووە چەندین روباری بچووک و دەریاچە لە عێراق وشکبکەن، پەرلەمانی عێراق و وەزارەتی سەرچاوە ئاوییەکان لەو بارەیەوە کۆبوونەوە و بڕیاریاندا گەر ئێران و تورکیا بەشە ئاوی عێراق بەرنەدەنەوە، ئەوە یاسایی بە تاوان بوونی ئاڵوگۆڕی بازرگانی لەگەڵ هەردوو وڵاتەکە دەردەکەن.
بەهۆی گرتنەوەی ئاو لەلایەن ئێران و تورکیا، چەندین دەریاچە و روبار لە عێراق وشکبوونە، هەروەها کەرتی کشتوکاڵ، ئاژەڵداری، گەشتیاری، سامانی ماسی و بەرهەمهێنانی کارەبا، تەنەنات ئاوی خواردنەوەش بە رێژەیەکی بەرچاو رووی لە کەمبوونەوە کردووە.
عەلی رازی، وتەبێژی وەزارەتی سەرچاوە ئاوییەکانی حکومەتی عێراق لە کۆنفرانسێکی رۆژنامەوانیدا رایگەیاند: "عێراق بە دوو رێگا کار لەسەر دۆسیەی ئاو دەکات، یەکەمیان عێراق دەیەوێت دانوستان لەگەڵ وڵاتانی سەرچاوە یان دراوسێ بکات، بۆ دڵنیابوون لە پشکی ئاوی عێراق، کە ئاو بۆ کەرتی کشتوکاڵ و ئاوی خواردنەوە و کەرتی بەکارهێنانی پیشەسازی و کارەبا لە خۆ دەگرێت، هەروەها بۆ راگرتنی هاوسەنگی ژینگەیی و پاراستنی پشکی زەنگاوەکان و مانەوەی ئەو ئاوانەی سەرچاوەی خوێن".
جێگری سەرۆکی پەرلەمانی عێراق و لیژنەی کشتوکاڵ و وەزارتی سەرچاوە ئاوییەکان، بۆ دۆزینەوەی چاسەری کەمبوونەوەی ئاو و وەرگرتنی هەڵوێستی توند بەرامبەر بە هەردوو وڵاتی ئێران و تورکیا، کۆبوونەوەیەکیان ئەنجامدا و بڕیاریاندا لە نزیکترین کاتدا پەرلەمانی عێراق لە سەر ئەو پرسە کۆببێتەوە و ئاڵوگۆڕی بازرگانی لەگەڵ ئەو دوو وڵاتە راگرن.
حاکم زاملی، جێگری سەرۆکی پەرلەمان گوتی: "ئەگەر وڵاتانی دراوسێ پشکی ئاوی عێراق بەرنەدەنەوە، ناچارین لە پەرلەمانی عێراق یاسایەک دەربکەین هەر کەسێک کاری بازرگانی و ئاڵوگۆڕی بازرگانی و هاوردەکردن و تەنانەت لەگەڵ کۆمپانیاکانی ئێران و تورکیا کار بکەن بە تاوان هەژمار بکرێت، چونکە هیچ رێگایەکی ترمان نییە".
گوتیشی: "باوەڕ ناکەم هیچ پەرلەمانتارێکیش هەبێت دەنگ نەدات بە یاسایەکی لەو جۆرە کە پەیوەندی بە ژیانی خۆمان و هاووڵاتیان و نەوەکانمانەوە هەیە، گرتنەوەی ئاو مانای ئەوەیە دەیانەوێت بمانكوژن".
ئەوەی جێی نیگەرانی عێراقە بۆ گفتوگۆکردن لەبارەی گرتنەوەی ئاوی دیجلە و فورات، بە نووسراوی فەرمی لە رێگای باڵیۆزخانەکانیانەوه داوایان لە هەردوو وڵاتی ئێران و تورکیا کردووە کۆببنەوە و میکانزمێک بۆ چارەسەر دابنێن، کەچی رێز لە داواکاریەکەی عێراق ناگرن و هیج وەڵامێکیان نادەنەوە.
حاکم زاملی دەڵێت: عێراق وڵاتێکی پڕ ناکۆکی سیاسی لاوازە بۆیە بەو جۆرە مامەڵەی لەگەڵ دەکرێت.