لە سلێمانی سەوزە قەدەغە دەکرێت
K24 - سلێمانی
بۆ رێگریکردن لە پەتای سکچوون و رشانەوە، تەندروستی سلێمانی داوا دەکات بەکارهێنانی سەوزە لە هەموو چێشتخانە و شوێنە گشتییەکان و دەستگێڕەکان قەدەغە بکرێت.
لە نووسراێکی بەڕێوەبەرایەتی تەندروستی سلێمانی کە ئاراستەی قایمقامیەتی ناوەندی سلێمانی کردووە تێیدا هاتووە: "لەپێناو بەرژەوەندی گشتی تەندروستی هاووڵاتیان و رێگریکردن لە بڵاوبوونەوەی پەتای سکچوون و رشانەوە، داوا دەکەین کە ئاگاداری لایەنە پەیوەندیدارەکان بکەنەوە کە بەکارهێنانی سەوزە لە هەموو چێشتخانە و شوێنە گشتییەکان و دەستگێڕەکان قەدەغە بکرێت، تا ئەوکاتەی کۆنترۆڵی پەتاکە دەکرێت".
پەیوەست بەو پرسە دوێنێ 15/6/2022، د. سەباح هەورامی، بەڕێوەبەری تەندروستی پارێزگای سلێمانی لە کۆنفراسێکی رۆژنامەوانیدا رایگەیاند: "رێژەی تووشبوون بە پەتای سکچوون لە پارێزگای سلێمانی زۆر زیادیکردووە و هیچ شوێنێک لە نەخۆشخانەی شار نەماوە و بە ناچاری نەخۆشخانەیەکی دیکەیان بۆ نەخۆشانی ئەو پەتایە تەرخانکردووە".
ئاماژەی بەوەشکرد: "هەرچەندە تا ئێستا بە پشکنین دەرنەچووە ئەم پەتایە کۆلێرا بێت، بەڵام بەپێی نیشانەکان گوماندەکەین پەتای کۆلێرا بێت".