پوتن: هەڵاوسانی جیهانی بەهۆی جەنگی ئۆکرانیاوە نییە

پوتن باسی گرانبوونی نرخی بەنزین و خۆراک دەکات
ڤلادیمێر پوتن، سەرۆکی رووسیا
ڤلادیمێر پوتن، سەرۆکی رووسیا

K24 - هەولێر:

ئەمڕۆ هەینی 17ـی حوزەیرانی 2022، ڤلادیمێر پوتن، سەرۆکی رووسیا لە کۆڕبەندی ئابووری نێودەوڵەتی سانت پترسبۆرگ وڵاتانی رۆژئاوای بە هۆکاری دروستبوونی هەڵاوسانی ئابووری تۆمەتبار کرد.

پوتن لەو کۆڕبەندەدا باسی لەوە کرد، "ئۆپەراسیۆنی سەربازی رووسیا لە دۆنباس نەبووەتە هۆی هەڵاوسانی ئابووری، بەڵکو ئەوە وڵاتانی رۆژئاوان کە لەپێناو پەردەپۆشکردنی هەڵەکانیان دۆخەکە لە بەرژەوەندی خۆیان دەقۆزنەوە".

پوتن گوتی: "هەڵەی سیستماتیک لە سیاسەتی ئابووری ئیدارەی ئێستای ئەمەریکا و بیرۆکراسی ئەوروپیدا بوونەتە هۆی گرانی، هەڵاوسانی ئابووری، کێشەی خۆراک و بەرزبوونەوەی نرخی بەنزین".

لە درێژەی قسەکاندا، پوتن گوتی: "وڵاتانی رۆژئاوا ئۆپەراسیۆنی سەربازی رووسیا لە ئۆکرانیا دەکەنە پاساوی هەڵە حسابیەکانیان، ئەم ئۆپەراسیۆنە بووەتە قەڵغانی پاساو بۆ ئەوان".

جێی وەبیرهێنانەوەیە، لە ماوەی هەفتەی رابردوودا، نرخی بەنزین لە زۆربەی وڵاتان دووبارە بەرزبوونەوەی بەخۆوە بینی، بەتایبەتی لە ویلایەتە یەکگرتووەکانی ئەمریکا و وڵاتانی ئەوروپا، هاوکات بەریتانیا پێشبینی کرد ئەمساڵ هەڵاوسان رێژەی لەسەدا 11 تێپەڕێنێت.