ته‌ندروستی هه‌ولێر ژماره‌یه‌ك رێنمایی به‌ هاووڵاتییان ده‌دات

"بۆ خۆپاراستن له‌ نه‌خۆشی كۆلێرا پابه‌ندی ئه‌م رێنماییانه‌ به"‌
ته‌ندروستی هه‌ولێر كۆمه‌ڵێك رێنمایی بۆ خۆپارێزی ده‌رده‌كات
ته‌ندروستی هه‌ولێر كۆمه‌ڵێك رێنمایی بۆ خۆپارێزی ده‌رده‌كات

K24- هه‌ولێر:

له‌ راگه‌یه‌ندراوێكدا بەڕێوەبەرایەتی گشتیی تەندروستی هەولێر ژماره‌یه‌ك رێنمایی بۆ خۆپارێزی له‌ تووشبوون به‌ نه‌خۆشی كۆلێرا به‌ هاووڵاتییانی سنووری ئه‌و پارێزگایه‌ ده‌دات و داوایان لێ ده‌كات، پابه‌ندی رێكار و رێنماییه‌كان بن.

له‌ راگه‌یه‌ندراوه‌كه‌دا كه‌ 8 خاڵ له‌خۆ ده‌گرێت، داوا له‌ هاووڵاتییان كراوه‌، خۆیان له‌ خواردنی ده‌روه‌ و سه‌ردانه‌پۆشراو به‌دوور بگرن و گرنگی به‌ ده‌ست شوشتن به‌ ئاو و سابوون و باش كوڵاندنی خواردن بده‌ن و له‌ خواردنه‌وه‌ی ئاوی به‌لووعه‌ دوور بكه‌ونه‌وه‌ و له‌جیاتی ئه‌و ئاوی ئاماده‌كراو یانیش كوڵێنراو به‌كاربهێنن. هه‌روه‌ها جه‌خت له‌سه‌ر دووركه‌وتنه‌وه‌ بۆ ماوه‌یه‌ك له‌ خواردنی ده‌ریایی و مه‌له‌كردن كراوه‌ته‌وه‌.

داوش له‌ هاووڵاتییان كراوه‌، له‌كاتی تووشبوون به‌ سكچوون و رشانه‌وه‌ گیراوه‌ی (Rice_based ORS) به‌كار بهێنن، ئه‌گه‌ر سكچوونه‌كه‌ش له‌ڕاده‌به‌ده‌ر بوو، له‌ ماوه‌ی 24 كاتژمێردا سه‌ردانی نزیكترین بنكه‌ی ته‌ندروستی بكه‌ن.

ده‌قی راگه‌یه‌ندراوی به‌ڕێوه‌به‌رایه‌تی گشتیی ته‌ندروستی هه‌ولێر:

هاوڵاتی خۆشەویست؛

بۆ ئەوەی تووشی سکچوونی توند (کۆلێرا) نەبی پێویسته ئەم خاڵانە پەیڕەو بکەیت:

1. ئەم ماوەیەدا خواردنی دەرەوە، خۆراكی سەردانەپۆشراو بەكار مەهێنە. تا دەتوانیت ژەمی نانخواردنت لە ماڵەوە بێت.

2. پێش نانخواردن و پاش چوونە توالێت، بە ئاو و سابوون بۆ ماوەی 20 چركە دەستەكانت بشۆ.

3. دوور بكەرەوە لە بەكارهێنانی ئاوی بەلووعە، بەڵكو ئاوی ئامادەكراو کولێندراو بەكاربهێنە بۆ خواردنەوە، (ئامادەكردنی خواردن، ددان شووشتن و قاپ شووشتن).

4. تا دەتوانیت لەم كاتەدا خواردنی دەریایی وەك ماسی مەخۆ، ئەو خواردنانەشی لە ماڵەوە ئامادەی دەكەیت وەك گۆشت، بەشێوەیەكی باش بکولێندرێت و بەگەرمی بخورێن.

5. بۆ ماوەیەكی كاتی خۆت لە مەلەوانیكردن لەناو مەلەوانگە و چەمەكان بپارێزە.

6. لە كاتی سكچوون و رشانەوە گیراوەی Rice_based ORS بەكار بهێنە، هەر كیسێك بخەرە ناو لیترێك ئاوی كوڵێندراو و لەدوای هەموو سكچوونێك، پەرداخێكی لێ بخۆرەوە تا قەرەبووی ئەو كانزا و ڤیتامینانەت بۆ بكاتەوە كە لێت رۆیشتووە.

7. ئەگەر گیراوەی ORS بەردەست نەبوو، دەتوانیت نیو كەوچكی چا (خوێ) لەگەڵ شەش كەوچكی چا (شەكر) بخەیتە ناو لیترێك ئاوی كوڵێندراو و گیراوەیەكی لێ دروست بكەیت. لە پاش هەر سكچوون و رشانەوەیەك پەرداخێكی لێ بخۆرەوە.

8. ئەگەر سكچوون و رشانەوەكەت لە رادەبەر بوو، بەجۆرێك توانای خواردن و خواردنەوەت نەما و تەواو شەكەت بوویت، باشترە لە ماوەی (24) كاتژمێردا سەردانی نزیکترین دەزگای تەندروستی بكەیش، بۆ بەمەبەستی ئەنجامدانی پشکنین لەگەڵ پزیشكی تایبەتمەند.

راگەیاندنی بەڕێوەبەرایەتی گشتیی تەندروستی هەولێر

19/6/2022

H.B