دەنگی هەورە گرمەی فاشیزم
بۆ ئێستا پرسی خۆ رێکخستنەوەی گوتاری ناسیۆنالیزمی کوردیی گرنگی حەتمیی هەیە بۆ ستاتۆی هەرێمی کوردستان.
لەسەردەمێکداین سەردەمی پوچگەرایی و زاڵبونی ناعەقڵانیەت و دەستبەسەراگرتنی سیستمی بازاڕو گوتاری کاپیتاڵ و نەوت و شمەکە بەسەر فکرو جیهانبینیی نەتەوەدا، بازاڕو مارکێتینگی شمەک هەژمووندارە بەسەر کۆی فیکرو مۆڕاڵ و ئایدۆلۆژیایەکی نیشتیمانیدا، ئەوەی تەحەددای نەماوە مرۆڤێکە هی سەرزەوی نییەو ژێرخاک خراوە، خۆشەویستی خاک جیاوازە لە سیستمی پاوانکارو گەندەڵ و بێ پرۆژە.
ئەم سەردەمە سەردەمی لێدانە لە رەمزو کاریزما راستیینەکان و دروستکردنی بت و تەوتەمی خەیاڵیی، بەشێکی کورد دەردێکی گرانی سادیست و سایکی بۆ دروست بووە کە حەزی لە گرمە گرمی فاشییەت و ئازاردانە، حەزی لە دەنگی زرێپۆش و زیلی عەسکەرییە، حەزی لە جەبەروتی پۆلیسە، حەزی بە یەکڕەنگییە، حەزی چووه‌تەوە سەر قابیل بۆ کوشتن و خوێنڕێژیی، بیری تۆپ و تەیارەو زیندان و فاشییەت دەکات، بیری سنوردانان و پەچەو تاریکی و تەجنیدو تەرحیل و تەعریب دەکات، ئەوەش قۆناغێکی تەواو مەترسیداری سیاسییە بۆ جەستەی هەرێم.
رۆحی كوردیی و گوتارەکەی ئاوا شپرزه‌یه له‌به‌رده‌م هەژموونی نەتەوەکانی سەردەستدا، وه‌ك بڵێی کورد وەک نەتەوە تاوانباره‌و چاوه‌ڕوانی سزادان و حوكمدان بكات لەلایەن ئەوانی ترەوە، ماکینەیەک میدیای پاسیڤ و خراپیش خەریکی پیشەسازیکردنن بۆ ئەو مامەڵە هەرزانە، یانی سەدساڵەو دوای سایکس بیکۆ، ئەو رۆحە شپرزە هەر ماوە، ئەو چاوەڕوانییە بەهەشتیی و ئیدیاڵە ئیدی لە نەتەوەی دیکەی فاشیزم تەواو کوشندەو ژەهراوییەو کاتی بەسەر چووە، ئه‌م رۆحه شپرزەو هیلاکە ناوخۆییە هه‌رگیز به‌رگریی پێناكرێت، ئیرادەی پێ دروست ناکرێ، بیری نەتەوەیی پێ رێک ناخرێ، هه‌رگیز ناسیۆنالیزم و هێڵی ستراتیجی نیشتیمانی پێ دروست ناكرێت، دێین و دەچین وەک کارپێکراو، دەبێت ئیتر رێکبخرێتەوەو چاک بکرێت و دوانەخرێت.
بۆ ئەو مەبەستە پێویستیمان به لۆبییه، به‌رگریكردن و لۆبیكردن ده‌بێت تێكه‌ڵی یه‌كدی بن، بۆ ئه‌وه‌ی چیتر تخوبی كه‌رامه‌ت و رۆحی نه‌ته‌وه‌یی ئێمه نه‌خرێته ژێر پرسیارو سوكایه‌تی بێماناو حەز بە هاتنەوەی بەعس و عەفلەقیەکان و قەومیەکان و عارفەکان نەکەین، خۆیه‌كلاییكردنه‌وه بۆ یەک رێگایەو نەک دوان، ئەوەش بە لێتێگه‌شتن و دیالۆگی دەستەبژێر دوور لە ژاوەژاوی میدیایی کە هه‌نگاوی یه‌كه‌مه، به‌شێكی ئه‌م ترس و فۆبیا سیاسیه‌ی وه‌ك خه‌مێك له قوڵایی گوتاری كوردیدا كار ئه‌كات لەم هەرێمە، بەتایبەت دوای سێجار هێرشی موشەکیی بۆ بنکەی هەناردەی گازی کۆرمۆر - کۆمپانیای داناگازی ئیماراتی، لە زۆنی قادرکەرەمی قەزای چەمچەماڵ لە 26-6-2022. زاده‌ی ئه‌وه‌یه كورد هیلاک بووە بەدەست بیری فاشیزم و عەقڵییەتی رافیزەو وەلائی و مەزهەبییەوە، زادەی ئەوەیە کورد میدیایەکی راقی و هاوچەرخی نییە بۆ گەیاندن و دەرگاکان هەموو لەسەرپشتە بۆ دزەکردنی بیری پاسیف و خۆبەدەستەوەدان و دڵخۆشکردن بەهاتنەوەی دوژمن، کورد میدیایەکی پەرچەکردارو ئایدۆلۆژیی کاتیی تاقەتبەری هەیە، هەمانکات بۆ گەیاندنی ئایدیاکانمان بۆ نمونە پرسی زمان و نەوت و گازو پێشێلی دەستوریی، هونه‌ری به‌رگریكردن و توڕەبوون دەزانین بەڵام دیالۆگ و گەیاندنی بیرو روانگەکان نا، چۆن ئەو مێنتاڵێتییە بگۆڕین لە عێراق؟
سه‌رجه‌می جووڵانه‌وه نه‌ته‌وه‌یی و سیاسییه‌كانی كورد دواجار له نه‌بوونی ئارگیومێنتی جدیدا وەگیروگاز هاتووە، هه‌میشه به‌رگریه‌كانیشمان په‌رچه‌كردارو ده‌نگدانه‌و دیاردەی سەوتی بووە، ئێستاش له‌ناو خۆماندا سه‌دان كه‌له‌به‌ر ده‌دۆزینه‌وه بۆ ئه‌وه‌ی سه‌ربه‌خۆ نه‌بین و ناوەندێتییەکی بەهێزی سەربازیی تاکڕەوی تۆتالیتار هەبێ بۆ بێدەنگکردنمان و هێشتا كۆده‌نگی نیشتیمانی نیه بۆ پرسی سەربەخۆیی و خۆبەڕێوەبەری و چیمان دەوێ نەک چیان لێمان دەوێ.