عێراق کۆنترین بنکەی سەربازی سوپاکەی دەکاتە زەوی نیشتەجێبوون و وەبەرهێنان
K24 - هەولێر:
ئەمڕۆ چوارشەممە 29ـی حوزەیرانی 2022، پارێزگاری نەینەوا، نەجم ئەلجبوری رایگەیاند، رەزامەندی ئەنجومەنی وەزیرانی عێراقی وەرگرتووە بۆئەوەی زەویەکانی بنکەی سەربازی "غەزلانی" بکاتە زەوی نیشتەجێبوون و وەبەرهێنان.
بنکەی سەربازی "غەزلانی" کۆنترین و گەورەترین بنکەی سەربازی سوپای عێراقە لە شاری موسڵ، رێکخراوی تیرۆریستی داعش لەکاتی کۆنترۆڵکردنی موسڵ لە 2014 کردیە گەورەترین پەناگە بۆ ئەندامانی.
نەجم ئەلجبوری لە بەیاننامەیەکدا گوتی: "پارێزگا و شارەوانی موسڵ دیزاینی مۆدێرن بۆ پرۆژەی زەویەکانی غەزلانی ئامادە دەکەن و پارچە زەوی دابین دەکەن و زەوی بۆ کۆمەڵگەی نیشتەجێبوون تەرخان دەکەن بەمەبەستی چارەسەرکردنی قەیرانی نیشتەجێبوون".
کێشەی زەویەکانی غەزلانی زیاتر لە چەند جارێک نوێ بووەتەوە، پێش ساڵی 2003 کامپێكی نیشتەجیبوون لە غەزلانی دروست کرا و ئێستا نزیکەی 1300 خێزانی تێدا دەژین کە چەندین جار رووبەڕووی هەرەشەی ئاوارەبوون و دەرکردن لە ماڵەکانیان بوونەتەوە.
