وه‌زاره‌تی كاره‌با: هەفتەی داهاتوو هەڵمەتێكی بڕینی كارەبای سەرپێچیكاران دەستپێدەكه‌ین

"سزایان ده‌ده‌ین و كاره‌بایان له‌سه‌ر ده‌بڕین"
وه‌زاره‌تی كاره‌بای حكومه‌تی هه‌رێمی كوردستان
وه‌زاره‌تی كاره‌بای حكومه‌تی هه‌رێمی كوردستان

K24 – هه‌ولێر:

وه‌زاره‌تی كاره‌با هۆشداری ده‌داته‌ ئه‌و هاووڵاتیانه‌ی سه‌رپێچیان له‌ پێوه‌ری زیره‌ك كردووه‌ و رایگه‌یاند، سزایان ده‌ده‌ین و كاره‌بایان له‌سه‌ر ده‌بڕین.

وه‌زاره‌تی كاره‌بای حكومه‌تی هه‌رێمی كوردستان ئه‌مڕۆ (پێنجشه‌ممه‌ 14ـی ته‌مموز/ یۆلیۆی 2022) روونكردنه‌وه‌یه‌كی بڵاوكرده‌وه‌، تێیدا هاتووه‌، پێوەری زیرەك بە هیچ شێوەیەك سەرپێچی لەسەر ناكرێت.

له‌ روونكردنه‌وه‌كه‌دا ئه‌وه‌ش خراوه‌ته‌ڕوو، ئەوانه‌ی سەرپێچیان لە دەرەوەی پێوەرەكە كردووەته‌ سەر تۆڕی نیشتمانیی كارەبا، زیان بە بەرژەوەندیی هاووڵاتیان و دادپەروەریی لە دابەشكردنی كارەبا دەگەیەنن.

ئاماژه‌ به‌وه‌شكراوه‌، راستەوخۆ لە رێگەی داتا سەنتەری پێوەری زیرەكەوە شوێنەکەیان دیاری كراوە، وەزارەتی كارەبا هەفتەی داهاتوو هەڵمەتێكی فراوانی بڕینی كارەبای سەرپێچیكاران دەست پێدەكات.