عێراق چەند رێکارێک دژی تورکیا دەگرێتەبەر
K24 - هەولێر
لەبارەی تۆپبارانی تورکیا بۆ سەر ناوچەیەکی گەشتیاری لە سنووری زاخۆ، ئه‌نجومه‌نی وه‌زاری ئاسایشی نیشتمانی عێراق بە سەرۆکایەتی مستەفا کازمی فەرماندەی گشتی هێزە چەکدارەکانی عێراق كۆبوونه‌وه‌یه‌كی به‌پەلەی رێکخست و چەند بڕیارێکی دژی هێرشەکانی تورکیادا.
دوای کۆبوونەوەکە لە راگەیەندراوێکدا ئه‌نجومه‌نی وه‌زاری ئاسایشی نیشتمانی عێراق رایگەیاند "بە توندی ئیدانەی هێرشەکەی تورکیا دەکەین، کە لە ناوچەیەکی گەشتیاری پارێزگای دهۆک گەشتیارانی کردە ئامانج و ژمارەیەک شەهید و برینداری لێکەوتەوە، داوا لە تورکیا دەکەین پێشێلکارییەکان رابگرێت و وەک دراوسێ رێز لە سەروەری خاکی عێراق و ئارامی هاووڵاتیان بگرێت".
راشیگەیاند "دەبێ تورکیا بە فەرمی داوای لێبوردن بکات و هەموو بنکە و بارەگا سەربازییەکانی لە تەواوی خاکی عێراق بکشێنێتەوە".
لە خاڵێکی راگەیەندراوەکەدا ئاماژە بەوەکراوە "ئەنجومەنی وەزارەتی دەرەوەی عێراق دۆسیێەک لەبارەی هێرشەکانی تورکیا بۆ سەر سەروەری خاکی عێراق دەکاتەوە و سکاڵای بەپەلە ئاراستەی ئەنجومەنی ئاسایشی نێودەوڵەتی و نەتەوە یەکگرتووەکان دەکات".
ئەوەشخراوەتەڕوو "وەزارەتی دەرەوەی عێراق بانگهێشتی باڵیۆزی تورکیا لە عێراق بکات و بڕیاری یەکلاکەرەوە بدرێت".
لە بەشێکی دیکەدا راگەیەندراوەکەدا هاتووە "لەسەر گرتنەبەری رێکارەکان بۆ رێگریکردن لە سەرپێچیەکان، هەماهەنگی لەگەڵ حکومەتی هەرێمی کوردستان بکرێت و فەرماندەیی ئۆپەراسیۆنە هاوبەشەکان راپۆرتێک لەسەر دۆخی سنووری نێوان عێراق و تورکیا و گرتنەبەری هەموو رێکارێکی پێویست ئامادە بکات".
ئه‌نجومه‌نی وه‌زاری ئاسایشی نیشتمانی عێراق راشیگەیاندووە "هێرشی گرووپە چەکدارەکان لەناو خاکی عێراق بۆ سەر هەر وڵاتێکی دیکە رەتدەکەینەوە".
