قوباد تاڵەبانی: پێویستە کاری لە پێشینەی حکومەتی نوێی عێراق رێککەوتن بێت لەسەر دۆسیەی نەوت

K24 - هەولێر:

قوباد تاڵەبانی، جێگری سەرۆکی حکومەتی هەرێمی کوردستان و مارک برایسن، باڵیۆزی بەریتانیا لە عێراق و دەیڤید هەنت کۆنسوڵی گشتی بەریتانیا لە هەرێم کۆبوونەوە و پرسی پێکهێنانی حکومەتی نوێی عێراقیان تاوتوێ کرد.

بەگوێرەی راگەیەندراوی نووسینگەی جێگری سەرۆکی حکومەتی هەرێمی کوردستان، قوباد تاڵەبانی لە کۆبوونەوەیدا لەگەڵ باڵیۆزی بەریتانیا، بەپێویستیزانیوە هەرێم و بەغدا لەسەر پرسی نەوت و گاز رێکبکەون و گوتیشی: "رێککەوتن لەسەر پرسی نەوت و گاز و پەسندکردنی یاساکەی، دەبێت لە ئەولەوییەتی دانووستانەکانی ئەم قۆناغەی پێکهێنانی حکومەتی داهاتووی عێراق بێت، چونکە رێککەوتن لەسەر ئەم پرسە زەمینەی لەبار بۆ رێککەوتن لەسەر پرسە چارەنووسسازەکانی دیکە دروستدەکات".

هەر لە چوارچێوەی ئەم پرسەدا، قوباد تاڵەبانی رایگەیاند، "عێراق لەوە زیاتر بەرگەی ململانێی ناپێویست لەسەر پۆست و ئیمتیاز ناگرێت و پێویستە لایەنەکان لە پرۆسەی پێکهێنانی حکومەتدا گفتوگۆکانیان لەسەر پرسە سیاسییە چارەنووسسازەکان و چۆنییەتی پێکهێنانی حکومەتێکی کارای خزمەتگوزار و چارەسەرکردنی ناکۆکییەکانی نێوان هەولێر و بەغدا چڕبکەنەوە"

هەروەها قوباد تاڵەبانی، باسی لە کێشەکانی ژینگە و مەترسییەکانی سەر سەرچاوە ئاوییەکانی عێراق و هەرێمی کوردستان کرد و بە پێویستیزانی کابینەی نوێی حکومەتی عێراق بیکات بە کاری لە پێشینەی.

بەگوێرەی راگەیەندراوی کۆبوونەوەکە "باڵیۆزی بەریتانیا، ئامادەیی وڵاتەکەی لە یارمەتیدانی هەرێمی کوردستان بۆ خێراترکردن و بەرەوپێشبردنی زیاتری پرۆسەی ریفۆرم لە دامەزراوەکانی حکومەتدا دووپاتکردەوە و ستایشی هەنگاوە چاکسازییەکانی حکومەتی هەرێمی کرد".

مارک برایسن داوایکرد، لە داهاتوویەکی نزیکدا حکومەتی هەرێم کۆبوونەوەیەکی تایبەت بۆ باڵیۆز و نێردە دیپلۆماسییەکان رێکبخات بۆ باسکردن و تاووتوێکردنی پرۆسەی ریفۆرم لە هەرێمی کوردستان.