سوپای عێراق پێگەکانی داعش لە چیای حەمرین بۆردومان دەکات
K24 - هەولێر
فڕۆكە جەنگییەكانی عێراق پێگه‌كانی داعشیان له چیای حەمرین بۆردومان کرد.
شانەی راگەیاندنی ئەمنیی عێراق لە راگەیەندراوێکدا ئاشکرای کرد، ئەمڕۆ شەممە 20/8/2022، حەشارگەکانی چەکدارانی داعش، لە ئەشکەوتەکانی زنجیرە چیای حەمرین لەلایەن فڕۆكە جەنگییەكانی هێزی ئاسمانی عێراق بۆردومان كراون.
ئاماژەی بەوەشکردووە، ھێرشە ئاسمانییەكە بۆ پشتیوانی هێزی پیادەی فەرماندەیی ئۆپەراسیۆنەکانی دیالە بووە و ئۆپەراسیۆنەکە بە ئامانجی راوەدوونانی پاشماوەکانی داعش لە زنجیرە چیاکانی حەمرین، بەردەوام دەبێت.
سەرەڕای بەردەوامی ئۆپەراسیۆنی هێزەکانی عێراق، چەکدارانی داعش لە ناوچە کوردستانییەکان و چەندین ناوچەی عێراق بەردەوامن لە پەلامار و کردەوە تیرۆرستییەکان، لە زۆربەی کۆبوونەوە و گفتوگۆکانیشدا وەزارەتی پێشمەرگە داوا لە وەزارەتی بەرگری عێراق کردووە، رێککەوتن و هەماهەنگی زیاتر لەنێوانیان هەبێت بۆ پڕکردنەوەی بۆشایی ئەمنی لە ناوچە کوردستانییەکان، کە بووەتە هۆی مانەوەی داعش لەو ناوچانە.