مه‌لا به‌ختیار له‌باره‌ی پۆستی سه‌رۆك كۆماره‌وه چاوه‌ڕێی سه‌پرایزێك ده‌كات
K24 - هه‌ولێر:
مه‌لا به‌ختیار له كۆنگره‌یه‌كی رۆژنامه‌وانیدا داوای له حكومه‌تی هه‌رێمی كوردستان كرد كێشه‌كانی پارێزگای سلێمانی چاره‌سه‌ربكات و راستییه‌كان به خه‌ڵكی پارێزگاكه بڵێت.
ئه‌مڕۆ شه‌ممه 3ـی ئه‌یلوولی 2022، مەلا بەختیار، ئەندامی ئەنجوومەنی باڵای سیاسی و بەرژەوەندییەکانی یەکێتی نیشتمانی کوردستان كۆنگره‌یه‌كی رۆژنامه‌وانی سازكرد و تێیدا باسی له دۆخی سیاسی هه‌رێمی كوردستان، ناكۆكی نێوان پارتی و یه‌كێتی له‌باره‌ی پۆستی سه‌رۆك كۆماری عێراق و ئه‌نجامدانی هه‌ڵبژاردنی په‌رله‌مانی كوردستانی كرد.
له‌باره‌ی كێشه‌كانی ئێستای پارێزگای سلێمانی ناوبراو رایگه‌یاند، ئه‌گه‌ر سلێمانی له‌ڕووی ئابووری و ئیدارییه‌وه شكستبهێنێت، پشكی یه‌كێـتی له‌نێو حكومه‌تی هه‌رێمی كوردستان لێی به‌رپرسیاره، هه‌روه‌ها داوایكرد حكومه‌تی هه‌رێمی كوردستان و په‌رله‌مان به‌شێوه‌یه‌كی جیددی كار له‌سه‌ر چاره‌سه‌ركردنی كێشه‌كانی شاره‌كه بكه‌ن، بێنه سه‌رخه‌ت و راستییه‌كان به خه‌ڵكی سلێمانی بڵێن.
مه‌لا به‌ختیار سه‌باره‌ت به هەڵبژاردنی بافڵ تاڵەبانی وەک سەرۆکی یەکێتی نیشتمانی کوردستان رایگه‌یاند، زۆرینەی ئەنجوومەنی سەرکردایەتی یه‌كێتی ئەو بڕیارەی داوە و ئێمەش پاڵپشتی لە بڕیاری زۆرینەی ئەنجومەنی سەرکردایەتی دەکەین.
پرسی لامه‌ركه‌زییه‌ت بۆ پارێزگای سلێمانی، یه‌كێك بوو له‌و بابه‌تانه‌ی مه‌لا به‌ختیار له‌وباره‌یه‌وه قسه‌یكرد و ئاماژه‌ی به‌وه‌دا، لا مه‌ركه‌زییه‌ت بۆ سلێمانی له‌دره‌وه‌ی یاسا و رێسای هه‌رێمی كوردستان و به‌ستنه‌وه‌ی به به‌غدا شكسیخوارد.
ناوبراو سه‌باره‌ت به ناكۆكی نێوان پارتی و یه‌كێتی سه‌باره‌ت به پۆستی سه‌رۆك كۆماری عێراق و هه‌ڵنه‌بژاردنی كاندیدێكی هاوبه‌ش رایگه‌یاند، هه‌ر چه‌نده پارتی و یه‌كێتی سوورن له‌سه‌ر به‌ربژێركردنی كاندیده‌كانیان، به‌ڵام چاوه‌ڕێی سوپرایزێك ده‌كه‌م. ده‌شڵێت، "ناكۆكی نێوان لایه‌نه سیاسییه‌كانی هه‌رێمی كوردستان له به‌رژه‌وه‌ندی قه‌واره‌ی هه‌رێمی كوردستاندا نییه و هه‌رێمی كوردستان لاواز ده‌كات".
له‌باره‌ی دۆخی ئێستای عێراق و خۆپیشاندانه‌كانی چه‌ند رۆژی رابردووی لایه‌نگرانی سه‌در له ناوچه‌ی سه‌وزی به‌غدا، ئەندامی ئەنجوومەنی باڵای سیاسی و بەرژەوەندییەکانی یەکێتی نیشتمانی کوردستان رایگه‌یاند، چاوه‌ڕێی رووداوه‌كانی ئێستای عێراق و رۆژهه‌ڵاتی ناوه‌راستییان ده‌كرد، نزیكترین ئه‌گه‌ریش بۆ دۆخی ئێستای عێراق ئه‌نجامدانی هه‌ڵبژاردنی پێشوه‌خته‌یه، چونكه ئه‌نجامدانی هه‌ڵبژاردنه‌كان تا راده‌یه‌ك دۆخی عێراق هێورده‌كاته‌وه و مه‌ترسی شه‌ڕی ناوخۆش دوورده‌خاته‌وه.
ئه‌نجامدانی هه‌ڵبژاردنه‌كانی داهاتووی په‌رله‌مانی كوردستان یه‌كێكی دیكه له‌و پرسانه‌بوو كه مه‌لا به‌ختیار له‌میانی كۆنگره رۆژنامه‌وانییه‌كه‌دا باسی لێوه‌كرد و ئاماژه‌ی به‌وه‌دا، روونه ئه‌گه‌ر پارتی و یه‌كێتی بیانویستبایه هه‌ڵبژاردنی په‌رله‌مانی كوردستان ئه‌نجامبده‌ن، هه‌ڵبژاردنه‌كان له مانگی ئۆكتۆبه‌ر ئه‌مساڵ ئه‌نجامده‌د‌ران، چاوه‌ڕێش ده‌كرێت هه‌ڵبژاردنه‌كان بۆ به‌هاری داهاتوو دوابخرێن.