مشکگرەکەی بەریتانیا لە کابینەی نوێدا دەمێنێتەوە

لاری، ریشی سوناکی و لیز تراس (سەرۆکوەزیرانی بەریتانیا)
لاری، ریشی سوناکی و لیز تراس (سەرۆکوەزیرانی بەریتانیا)

K24 – هەولێر

سەرۆکوەزیرانی نوێی بەریتانیا هەڵبژێردرا و کلیلی خانووی ژمارەی 10ی داونینگ ستریتیشی پێدرا، بەڵام ئەوەی تا ئێستا بەلای زۆربەی خەڵکەوە روون نییە، چارەنووسی "لاری"ـیە.

زیاتر لە دەیەیەکە، لاری (پشیلە ناودارەکەی بەریتانیا) لە نووسینگەی سەرۆکوەزیرانی بەریتانیا دامەزراوە و ئەرکی راوەمشکی پێئەسپێردراوە.

"لاری" هەڵگری نازناوی "مشکگری" کابینەی حکومەتە.

بەپێی زانیارییەکانی ماڵپەڕی داونینگ ستریت (حکومەتی بەریتانیا)، ئەرکەکانی لاری بریتین لە "پێشوازیکردن لە میوانانی نووسینگە، پشکنینی پەرژینە ئەمنییەکان و راوکردنی مشکەکانی نووسینگەکە". ستافی نووسینگەی سەرۆکوەزیران، خەرجیی پشیلەکەیان لەئەستۆ گرتووە.

لاری، زۆری حەز لە میوانی پیاو نییە، بەڵام لەگەڵ باراک ئۆباما سەرۆکی پێشووی ئەمریکادا کێشەی نەبووە و جارێکیش لەژێر ئۆتۆمبێلی دۆناڵد ترامپدا، سەرخەوێکی شکاندووە. لاری، ناوبانگێکی زۆری دەرکردووە و تەنها لە تۆڕی کۆمەڵایەتی توویتەردا، خاوەنی زیاتر لە 650 هەزار فۆڵۆوەرزە.

میدیاکانی بەریتانیا دوای گۆڕانکاری لە سەرۆکوەزیران و کابینەکەیدا، دیسان زوومی کامێراکانیان خستەوە سەر "لاری".

"لاری"، کارمەندی فەرمی داونینگ ستریتە و پەیوەندی بە بۆریس جۆنسۆنەوە نییە، هەر بۆیە لە پۆست و پێگەی خۆیدا دەمێنێتەوە و پێدەچێت ئەمەش هەواڵێکی خۆش بۆ بەریتانییەکان بێت.

ز