ئاژانسی نێودەوڵەتی وزەی ئەتۆم: یۆرانیۆممان لە هەندێک بنکەی ئێراندا دۆزیوەتەوە
K24 - هەولێر:
سەرۆکی ئاژانسی نێودەوڵەتی وزەی ئەتۆم، داوا لە ئێران دەکات، بەزووترین کات وەڵامی پرسیارەکانیان بداتەوە و دەست بە هەماهەنگییەکانیان بکه‌نه‌وه.
رافایل گرۆسی سەرۆکی ئاژانسی نێودەوڵەتی وزەی ئەتۆم، رایگه‌یاند، یۆرانیۆممان لە هەندێک بنکەی رانەگەیه‌ندراوی ئێراندا دۆزیوەتەوە و پرسیارمان لێکردوون روونکردنەوە بدەن، بەڵام بەرپرسانی تاران دەڵێن ئێوە لایەنگیری دەکەن.
هه‌روه‌ها گوتی: "هیچ ئاڵۆزیی و ناڕوونیەک لەم بابەتەدا نییە، ئێمە پاشماوەی یۆرانیۆممان لە چەند شوێنیک دۆزیوەتەوە و نەدەبوو هیچکات لەو شوێنانە ئێران چالاکی ئەتۆمی هەبێت".
ده‌شڵێت: "هیوادارم ئێران بەزووترین کات دەست بە هەماهەنگییەکانی لەگەڵ ئاژانسەکەمان بکاتەوە".
پێشتریش ناسر کەنعانی، گوتەبێژی وەزارەتی دەرەوەی ئێران رایگەیاندبوو، بۆ گەیشتن به رێککەوتنی تایبه‌ت به دۆسییه‌ی ئه‌تۆمیی، تاران خوازیار و ئامادەیه، لەو باوەڕەدایە بوونی ئیرادەی پێویست و خۆبەدوورگرتن لە گوشاری دەرەکی، دەتوانێت خێرا بمانگه‌یه‌نێت بە رێککەوتن.