بافڵ تاڵەبانی: عێراق بە دۆخێكی هەستیاردا تێدەپەڕێت
K24 – هەولێر
بافڵ جەلال تاڵەبانی، سەرۆکی یەکێتیی نیشتمانیی کوردستان رایگەیاند: عێراق بە دۆخێكی سیاسی هەستیاردا تێدەپەڕێت و ئەركی هەموولایەكە بە رۆحێكی بەرپرسیارانەوە مامەڵە بكەن.
ئەو گوتانەی بافڵ تاڵەبانی لەمیانی کۆبوونەوەی بووە لەگەڵ هادی عامری و سەرۆکی ھاوپەیمانیی فەتح.
دوای کۆبوونەوەی لەگەڵ سەرۆک بارزانی لە پیرمام، بافڵ تاڵەبانی چووەتە بەغدا و لەگەڵ هادی عامری کۆبووەتەوە.
بەگوێرەی راگەیەندراوی نووسینگەی بافڵ تاڵەبانی لە کۆبوونەوەیاندا لەگەڵ هادی عامری، گفتوگۆیان لەبارەی دۆخی سیاسی و تێپەڕاندنی بەربەستەكان كردووە و هەنگاوەكانی تێپەڕاندنی ئەو تەنگەژە سیاسییەی عێراقی تێكەوتووە تاوتوێكراوە.
وەک لە راگەیەندراوەکەدا هاتووە بافڵ تاڵەبانی، جەختی لە گفتوگۆ و رێككەوتنی نیشتمانی كردوەتەوە و لەسەر بنەمای دەستوور و هاوبەشیی راستەقینە. گوتوشیەتی: "عێراق بە دۆخێكی سیاسی هەستیاردا تێدەپەڕێت و ئەركی هەموولایەكە بە رۆحێكی بەرپرسیارانەوە مامەڵە بكەن و كار بۆ بونیادنانی داهاتوویەكی سەقامگیر بكەن".
