عێراق بۆ کێشەی بێکاری داوای هاوکاری لە ئەڵمانیا دەکات

ئاڵای عێراق و ئه‌ڵمانیا
ئاڵای عێراق و ئه‌ڵمانیا

K24 - هه‌ولێر:

 وەزیری کار و کاروباری کۆمەڵایەتی عێراق رایگەیاند، پێشنیارێک پێشکەش بە مارتن بیگەر باڵیۆزی ئەڵمانیا لە بەغدا کراوە، بۆ ئاڵوگۆڕی ئەزموونەکان لە نێوان هەردوو وڵات و واژۆکردنی یاداشتنامەی لێکتێگەیشتن بە مەبەستی دامەزراندنی ناوەندی ڕاهێنانی ئەڵمانی لە عێراق.

لە راگەیەندراوەکەدا هاتووە ئامانجی سەنتەرەكان فێركردنی لاوانە بەمەبەستی دۆزینەوەی دەرفەتی کار , هەروەها میکانیزمێک هەیە بۆ ناونوسین لەڕێگەی بەڕێوەبەرایەتی سەنتەری ڕاهێنان لە وەزارەتی کار و کاروباری کۆمەڵایەتی و مەرج و تایبەتمەندی هەیە بەپێی لێهاتووییە پێویستەکان".

پێشتر حکومەتی عێراقی ئاشکرای کردبوو کە رێژەی بێکاری لە عێراقدا گەیشتووەتە ١٣،٨٪ ،کە دەکاتە نزیکەی ٤ ملیۆن بێکار، زیاتر لە ١١ ملیۆن عێراقی لە ژێر هێڵی هەژاریدان و بەپێی دوایین ئاماری بانکی نێودەوڵەتی رێژەی بێکاری لەنێو گەنجانی عێراقدا گەیشتووەتە 36٪ واتا لە هەر سێ گەنج، گەنجێک بێکارە.