به‌ فه‌رمی كاتی به‌ڕێوه‌چوونی یاری كلاسیكۆ دیاریكرا

كلاسیكۆی نێوان ریال مه‌درید و بارسێلۆنا
كلاسیكۆی نێوان ریال مه‌درید و بارسێلۆنا

ئه‌نجوومه‌نی لالیگا به‌ فه‌رمی كاتی به‌ڕێوه‌چوونی یاریی كلاسیكۆی له‌ گه‌ڕی نۆیه‌می خولی پله‌یه‌كی ئیسپانیا دیاریكرد.

ئه‌مڕۆ دووشه‌ممه‌، 26 ئه‌یلوولی 2022، ئه‌نجوومه‌نی لالیگا رایگه‌یاند یاریی كلاسیكۆ له‌ نێوان بارسێلۆنا و ریال مه‌درید له‌ رۆژی 16ـی ئۆكتۆبه‌ری مانگی داهاتوو له‌ كاتژمێر 05:15 خوله‌كی ئێواره‌ به‌ كاتی باشووری كوردستان له‌ یاریگه‌ی سانتیاگۆ بێرنابیۆ به‌ڕێوه‌ده‌چێت.

یانه‌ی ریال مه‌درید تاكه‌ یانه‌یه‌ له‌م وه‌رزه‌ له‌سه‌ر ئاستی پێنج خوله‌ به‌هێزه‌كه‌ی ئه‌ورووپا هیچ یارییه‌كی نه‌دۆڕاندووه‌ و به‌ 18 خاڵ لوتكه‌ی لالیگای گرتووه‌، له‌ به‌رامبه‌ردا بارسێلۆنا به‌ 16 خاڵ پله‌ی دووه‌می گرتووه‌.

به‌ گوێره‌ی میدیایه‌كانی ئیسپانیا بارسێلۆنا بۆ یارییه‌كه‌ی كلاسیكۆ له‌ تواناكانی هه‌ردوو به‌رگریكاری یانه‌كه‌ی رۆناڵد ئاراوخۆ و جول كۆندی بێبه‌ش ده‌بێت، ریال مه‌ریدیش له‌ چاوه‌ڕوانی چاكبوونه‌وه‌ی پێكانه‌كه‌ی كه‌ریم بێنزێمایه‌ كه‌ هێشتا نه‌گه‌ڕاوه‌ته‌وه‌ یاریكردن.