بافڵ تاڵه‌بانی هێرشه‌كانی ئێران به پێشهاتێكی ترسناك و مەترسیدار ده‌زانێت
K24 – هه‌ولێر:
سەرۆکی یەکێتیی نیشتمانیی کوردستان له‌باره‌ی هێرشه‌كانی كۆماری ئیسلامی ئێران بۆسه‌ر هه‌رێمی كوردستان ئاشكرای ده‌كات، هیچ پاساوێك بۆ ئەم سنووربەزاندنە نییە و مەترسییەكی گەورەیە بۆ سەر ئارامی و ئاسایشی هەرێمی كوردستان و عێراق.
بافڵ جەلال تاڵەبانی سەرۆکی یەکێتیی نیشتمانیی کوردستان راگه‌یه‌ندراوێكی بڵاوكرده‌وه، تێیداهاتووه: بەنیگەرانییەكی زۆرەوە لە بۆردومانەكانی ئەمڕۆی كۆماری ئیسلامی ئێران بۆسەر خاكی هەرێمی كوردستان دەڕوانین، كە چەندین شەهید و برینداری لێكەوتووەتەوە و دەیان خێزانیش ئاوارەبوون.
هه‌روه‌ها راشیگه‌یاند، ئەمە پێشهاتێكی ترسناك و مەترسیدارە كە قووڵایی هەرێمی كوردستانی گرتووەتەوە و داوای دەستبەجێ راگرتنی دەكەین.
ئه‌وه‌شی خسته‌ڕوو، هیچ پاساوێك بۆ ئەم سنووربەزاندنە نییە و مەترسییەكی گەورەیە بۆ سەر ئارامی و ئاسایشی هەرێم و عێراق، داواكارین خاكی هەرێمی كوردستان بۆ یەكلاییكردنەوەی كێشە سیاسی و سەربازییەكان بەكارنەهێنرێت و هاووڵاتییان نەكرێنە قوربانیی ململانێكان. داواكارین هەموولایەك خۆڕاگربن و گفتوگۆ بكەنە بنەمای چارەسەركردنی كێشەكان.
داواشی لە حكومەتی عێراق كرد، ئەرك و بەرپرسیارییه‌تی خۆی لە پاراستنی خاكی عیراق و هەرێم جێبەجێبكات و سەروەری وڵات بپارێزێت و رێگری لە پێشێلكاری و چەندبارەبوونەوەی هێرشەكان بكات.
پرسە و هاوخەمی قووڵیشی ئاڕاستەی كەسوكاری شەهیدان كرد و هیوای چاكبوونەوە بۆ بریندارەكان خواست. ده‌شڵێت: "وەك ئەركێكی نەتەوەیی و نیشتمانی خۆمان، هەموو دامەزراوە پەیوەندیدارەكانمان راسپاردووە بە دڵسۆزییەوە ئەركەكانیان رابپەڕێنن و لەخزمەت هەموواندا بن".
هەموولایەكیش دڵنیاده‌كاته‌وه كه بەئامانجگرتنی هاووڵاتییانی هەرێمی كوردستان و تێكدانی سەقامگیر، هەرگیز لەیادناكەین و رشتنی خوێنی خەڵك لەبیرناچێتەوە.