حووسییه‌كان هۆشداری ده‌ده‌ن

ئاگاداركردنه‌وه‌یه‌ك ده‌داته‌ كۆمپانیا بیانییه‌كانی كه‌رتی نه‌وتی سعوودییه‌ و ئیمارات
نمایشی حووسییه‌كانی یه‌مه‌ن
نمایشی حووسییه‌كانی یه‌مه‌ن

K24 – هه‌ولێر:

هێزه‌ چه‌كداره‌كانی سه‌ر به‌ حووسییه‌كانی یه‌مه‌ن، رایگه‌یاند، ئه‌و كۆمپانیا نه‌وتیانه‌ی له‌ ئیمارات و سعوودییه‌ كار ده‌كه‌ن، دوای چه‌ند كاتژمێرێك له‌ كۆتاییهاتنی ئاگربه‌ستی نێوان حووسییه‌كان و سعوودییه‌ پێویسته‌ ئه‌و وڵاتانه‌ به‌جێبهێڵن.

له‌ به‌یاننامه‌یه‌كدا، هێزه‌ چه‌كداره‌كانی حووسیی ئاشكرایكردووه‌، توانایان هه‌یه‌، سعوودییه‌ و ئیمارات له‌و سه‌رچاوانه‌ بێبه‌ش بكه‌ن، كه‌ ئه‌وان خه‌ڵكی یه‌مه‌نیان لێ بێبه‌ش كردووه‌.

داوایشیان كردووه‌، كۆمپانیا نه‌وتییه‌ بیانییه‌كان له‌ سعوودییه‌ و ئیمارات بارگه‌ و بنه‌یان بپێچنه‌وه‌ و خۆیان بۆ چوونه‌ ده‌ره‌وه‌ له‌و وڵاتانه‌ ئاماده‌ بكه‌ن.

هه‌روه‌ها هاتووه‌: هه‌موو شتێك رێی تێ ده‌چێت، گه‌لی یه‌مه‌ن خاوه‌ن مافه‌ و ده‌شتوانێت ئه‌و مافه‌ی وه‌ربگرێته‌وه‌، مادام هه‌موو رێگه‌یه‌كی ئاشتیانه‌ی به‌ روودا داخراوه‌.

پێش مانگی ره‌مه‌زانی رابردوو، حووسییه‌كان و سعوودییه‌ ئاگربه‌ستیان راگه‌یاند و دواتر بۆ ماوه‌ی دوو مانگ ئاگربه‌ستیان درێژ كرده‌وه‌.

سعوودییه‌ سه‌رۆكایه‌تی هاوپه‌یمانییه‌كی عه‌ره‌بی ده‌كات و له‌ ناوه‌ڕاستی مانگی ئازاری 2015ه‌وه‌ شه‌ڕی له‌ دژی حووسییه‌كان راگه‌یاندووه‌ و له‌ رێی زه‌وی و ئاسمانه‌وه‌ بۆردومانیان ده‌كات.

حووسییه‌كان په‌ره‌یان به‌ مووشه‌كی دوورمه‌ودا و فڕۆكه‌ی بێفڕۆكه‌وان داوه‌ و چه‌ند جارێك هێرشیان كردووه‌ته‌ سه‌ر كۆمپانیای نه‌وتی ئارامكۆ.