مەسرور بارزانی و مستەفا کازمی کێشەکانی نێوان هەرێمی کوردستان و حکومەتی فیدراڵی تاوتوێ دەکەن
K24 - هەولێر:
مەسرور بارزانی، سەرۆکی حکومەتی هەرێمی کوردستان ئەمڕۆ دووشەممە (3ـی تشرینی یەکەمی 2022) پێشوازی لە مستەفا کازمی، سەرۆک وەزیرانی فیدراڵ کرد و لە کۆبوونەوەکەدا گفتوگۆ دەربارەی کێشەکانی نێوان هەرێمی كوردستان و حكومەتی فیدراڵی کرا.
لە كۆبوونەوەكەدا، هەردوولا جەختیان لە پێویستیی بەردەوامبوونی گفتوگۆ كردەوە بەمەبەستی تێپەڕاندنی ئاستەنگەكان.
ئاماژە بەوەشدرا، ژماره‌یه‌ك بابەتی تایبەت بە گوزەرانی هاووڵاتییانی هه‌رێمی كوردستان تاووتوێ کران و هەردوولا هاوڕابوون لەسەر ئەوەی، پێویستە بەرژەوەندی هاووڵاتییان بە سەرجەم پێکهاتەکانەوە و ماف و شایستە دەستوورییەکانیان لە سەرتاسەری وڵات، بە هەرێمی کوردستانەوە، لە پێشینەی کارەکاندا بێت.
لە كۆبوونەوەكەدا، پێویستیی بەردەوامبوونی كۆبوونەوە هاوبەشەكان و مامەڵەكردن بەشێوەیەکی جیددی لەگەڵ هەموو دۆسییەکان و رەخساندنی هەلومەرجی باش بۆ گفتوگۆی بنیاتنەرانە كە ببێتە هۆی چارەسەرەکردنی کێشەکان لە چوارچێوەی دەستووردا، دووپاتکرایەوە.
