كه‌نه‌دا سزا به‌سه‌ر 10 هه‌زار به‌رپرس و ئه‌ندامی سوپای پاسدارانی ئێران ده‌سه‌پێنێت
K24 – هه‌ولێر:
له‌درێژه‌ی سه‌پاندنی سزاكانی وڵاتانی رۆژئاوا بۆ سه‌ر ئێران، حكومه‌تی كه‌نه‌دا بڕیاریدا سزا به‌سه‌ر 10 هه‌زار به‌رپرس و ئه‌ندامی سوپای پاسداران و ده‌زگا ئه‌منییه‌كانی دیكه‌ی ئه‌و وڵاته بسه‌پێنێت.
ئه‌مڕۆ هه‌ینی (7ی تشرینی یه‌كه‌م/ئۆكتۆبه‌ری 2022)، جه‌ستن ترودۆ، سه‌رۆك وه‌زیرانی كه‌نه‌دا سوپای پاسدارانی تۆمه‌تباركرد به به‌شداریكردن له ئه‌شكه‌نجه‌دانی خۆپیشانده‌ران و روونیكرده‌وه، به‌پێی یاسای پاراستنی كۆچبه‌ران و په‌نابه‌رانی وڵاته‌كه‌ی زیاتر له 10 هه‌زار ئه‌فسه‌ر و ئه‌ندامی باڵای سوپای پاسداران و ده‌زگا ئه‌منییه‌كانی دیكه‌ی ئێران، سزادراون.
سه‌رۆك وه‌زیرانی كه‌نه‌دا ئاماژه‌ی به‌و هه‌نگاوه‌ی حكومه‌ته‌كه‌ی كردووه و به به‌هێزترین رێكاری داناوه كه دژی ئه‌و رژێمانه گرتوویه‌ته‌به‌ر كه به‌شداربوونه له ئه‌نجامدانی تاوانی جه‌نگ و چه‌وساندنه‌وه‌ی گه‌له‌كانیان.
رۆژی دووشه‌ممه (3ی تشرینی یه‌كه‌م/ئۆكتۆبه‌ری 2022)، مێلانی ژۆلی، وه‌زیری ده‌ره‌وه‌ی كه‌نه‌دا ئاشكرایكرد، وڵاته‌كه‌ی رێوشوێنی ئابووری نوێ ده‌گرێته‌به‌ر دژ به تاران، به‌هۆی پێشێلكارییه به‌رده‌وامه‌كانی مافی مرۆڤ و سنوورداركردنی ئازادییه‌كانی ژنان له‌و وڵاته.
هه‌روه‌ها ئاماژه‌ی به‌وه‌كرد، حکومەتی کەنەدا سزای به‌سه‌ر 25 کەسایەتی و نۆ دامەزراوەی ئێران سەپاندووە، لەوانەش چه‌ند به‌رپرسێكی باڵای سوپای پاسداران و وەزارەتی ئیتڵاعاتی تێدایه.
به‌گوێره‌ی ئه‌و سزایانه‌ش، هه‌ر سه‌روه‌ت و سامانێكی ئه‌و به‌رپرس و دامه‌زراوه ئێرانییه له كه‌ندا هه‌بێت، بلۆك ده‌كرێن و به‌گوێره‌ی یاساكانی ئه‌و وڵاته‌ش له رێگه‌پێدانی گه‌شتكردن و مافی مانه‌وه له وڵاتی كه‌نه‌دا بێبه‌شده‌كرێن.
دوای کوژرانی ژینا ئەمینی دەنگی ناڕازی لە شەقامەکانی ئێران و چەندین وڵاتی جیهان هەستا، کۆمەڵگای نێودەوڵەتیش بە توندی ئیدانەی ئەنجامدەرانی ئەو تاوانەیان کرد و ئەمریکا و کەنەداش راستەوخۆ سزای نوێیان بەسەر ئێراندا سەپاند.
پێشتریش حكومه‌تی كه‌نه‌دا سزای به‌سه‌ر 41 به‌رپرسی ئێرانی و 161 دامه‌زاروه‌ی ئه‌و وڵاته سه‌پاندبوو لەوانە سووپای پاسدارانی و چه‌ندین دامه‌زراوه‌ی دیكه‌ی ئه‌منی و ئابووری.
دوای ئه‌وه‌ی "ژینا ئه‌مینی" ناسراو به "مه‌هسا ئه‌مینی" (22 ساڵ)، خه‌ڵكی شاری سه‌قزی رۆژهه‌ڵاتی كوردستان، له میانه‌ی گه‌شتێكدا بۆ تاران، له‌لایه‌ن هێزه ئه‌منییه‌كانه‌وه ده‌ستبه‌سه‌ركرا و به‌هۆی ئه‌شكه‌نجه‌دانییه‌وه به سه‌ختی بریندار بوو و پاشان رۆژی هه‌ینی رابردوو (16ی ئه‌یلوول/سێپتێمبه‌ری 2022)، له نه‌خۆشخانه به‌هۆی سه‌ختی برینه‌كه‌یه‌وه گیانی له‌ده‌ستدا.
بەگوێره‌ی زانیارییه‌كانی چالاکوانانی مافی مرۆڤ له ئێران (هرانا) بڵاوکراوەتەوە، لە یەکەم رۆژی راگەیاندنی گیان لەدەستدانی ژینا ئەمینی تا ئێستا، 289 خۆپێشاندان لە 103 شار و شارۆچکە و 48 زانکۆی ئێران ئه‌نجامدراوه.
هه‌روه‌ها بەپێی سەرچاوە نافەرمییەکان، تا ئێستا نزیکەی 130 هاووڵاتی لە خۆپێشاندانەکان و بە تەقەی راستەوخۆی هێزە ئەمنییەکانی ئێران گیانیان لەدەستداوە و بە سەدان کەس برینداربوونە و زیاتر لە 1000 كه‌س دیكه‌ش ده‌ستگیركراون.