چوارچێوەی هەماهەنگی بۆ پێکهێنانی حکومەت چاوەڕێی کاندیدی سەرۆک کۆمارە
K24 - هەولێر
چوارچێوەی هەماهەنگی رایدەگەیەنێت، پێکهێنانی حکومەت لەسەر یەکلاکردنەوەی کاندیدی سەرۆک کۆمار راگیراوە.
ئەحمەد ئەسەدی، سەرکردە لە چوارچێوەی هەماهەنگی لە لێدوانێکی رۆژنامەوانیدا رایگەیاند "پێکهێنانی کابینەی نوێی حکومەتی عێراق لەسەر یەکلاکردنەوە و هەڵبژاردنی سەرۆک کۆمار راگیراوە، گفتوگۆی نێوان پارتی و یەکێتیش بۆ ئەو مەبەستە بەردەوامە و هاوپەیمانی بەڕێوەبردنی دەوڵەت، پشتیوانی ئەو دوو حزبە دەکات بۆ ئەوەی کاندیدێک دیار بکەن".
گوتیشی: "کورد دوو بژاردەی لەبەردەمە، یان رێککەوتن لەسەر کاندیدێک، یان دووبارەبوونەوەی سیناریۆی ساڵی 2018 و چوونە ناو کۆبوونەوەی پەرلەمان و یەکلاییکردنەوەی کاندیدی سەرۆککۆمار بە پەرلەمانتاران".
ئاماژەی بەوەشدا، چوارچێوەی هەماهەنگی ئامادەیە بۆ پێکهێنانی حکومەت بە سەرکردایەتی محەمەد شیاع سوودانی، کارنامەیەکیشن ئامادەکراوە کە تەواوی لایەنە سیاسییەکان قبووڵیان کردووە و پێی رازین.