شاخەوان عەبدوڵڵا: سبەی پەرلەمانی عێراق بۆ هەڵبژاردنی سەرۆک کۆمار کۆنابێتەوە

K24 - هەولێر

جێگری سەرۆکی ئەنجومەنی نوێنەرانی عێراق رایدەگەیەنێت، سبەی پەرلەمانی عێراق بۆ هەڵبژاردنی سەرۆک کۆمار کۆنابێتەوە.

شاخەوان عەبدوڵڵا، جێگری دووەمی سەرۆکی پەرلەمانی عێراق بە کوردستان24ی راگەیاند "سبەی پەرلەمان بۆ هەڵبژاردنی سەرۆککۆمار کۆنابێتەوە".

دوێنێ دووشەممە 10/10/2022، موحسین مەندەلاوی، جێگری یەکەمی سەرۆکی پەرلەمانی عێراق رایگەیاندبوو، 170 واژۆ پێشکەشی سەرۆکایەتی پەرلەمان کراوە، بۆ ئەوەی رۆژی چوارشەممە پەرلەمان کۆببێتەوە و دەنگ لەسەر کاندیدی سەرۆککۆمار بدات.

چەکدار جەمال، پەیامنێری کوردستان24 لە بەغدا رایگەیاند: "تائێستا هەموو لایەنەکانی ناو چوارچێوەی هەماهەنگی لەسەر ئەو کۆک نین کە محەمەد شیاع سوودانی کاندیدی سەرۆک وەزیرانی عێراق بێت".

گوتیشی: "هەندێک لایەن لەناو چوارچێوەی هەماهەنگی پێشنیازی ئەوەیان کردووە، بۆ دەربازبوون لە دۆخی چەقبەستووی عێراق کاندیدی سەرۆک وەزیران بگۆڕن و لە جیاتی محەمەد شیاع سوودانی کەسێکی دیکە کاندید بکرێت، کە هەموو لایەنەکان لەسەر کۆکبن، بەڵام نووری مالیکی سوورە لەسەر مانەوەی محەمەد شیاع".