لەبەر چەند هۆکارێك فێستیڤاڵی جووتیارە نموونەییەکەی هەڵەبجە لە هەولێر ئەنجام نادرێت

ئازاد محەمەد، جووتیارە نموونەییەکەی هەڵەبجە
ئازاد محەمەد، جووتیارە نموونەییەکەی هەڵەبجە

K24 - هەولێر:

جووتیارە نموونەییەکی هەڵه‌بجە رایدەگەیه‌نێت کە قائیمقامی هەولێر رێگەی نەداوە فێستیڤاڵی هەنار لە هەولێر ئەنجام بدات، قائیمقامیش دەڵێت نەک هەر من پارێزگاریش رەزامەندی نەداوە و لە کۆبوونەوە لەگەڵ بەڕێوەبەرایەتی کشتوکاڵی هەولێر ئەوانیش رەزامەند نەبوونە.

ئازاد محەمەد، جووتیارە نموونەییەکەی هەڵەبجە بە کوردستان24 راگەیاند، قائیمقامی هەولێر رێگەی نەداوە هەمان شێوەی ساڵی رابردوو فێستیڤاڵی هەنار لە شاری هەولێر ئەنجام بدەن.

گوتیشی: سه‌ره‌ڕای ئه‌وه‌ی پارێزگار دووجار نووسراوی كردووه‌ بۆمان بۆ لای قائیمقام، به‌ڵام قائیمقام رێگەی نەداوە و تاوەکو ئێستا بە فەرمی وەڵامیان نەداونەتەوە، لای خۆیەوە نەبەز عەبدولحەمید، قائیمقامی قەزای ناوەندی هەولێر بە کوردستان24ی راگەیاند، بەڵێ ئەو جووتیارە داواکاری پێشکەش بە پارێزگا کردووە و پارێزگاریش رەزامەندی نەداوە بەڵکو نووسراوەکەی ئاراستەی ئەوان کردووە، ئەوانیش پاش کۆبووونەوە لەگەڵ بەڕێوەبەرایەتی کشتوکاڵی هەولێر گەیشتوونەتە ئەو بڕیارەی کە فێستیڤاڵەکە نەکرێت.

داواکاری ئازاد محەمەد لە بەڕێوەبەرایەتی کشتوکاڵی هەولێر، پارێزگا و قائیمقامیەت رەزامەندی پێنەدراوە، ئەمەش بە چەند هۆکارێک یەکێک لە هۆکارەکان ئەوەیە لە چەند رۆژی داهاتوودا پێشانگایەکی گەورەی بەرووبوومە کشتوکاڵییەکان لە پایتەختی هەرێمی کوردستان دەکرێتەوە و تەواوی جووتیاران دەتوانن بەشداربن تێیدا، هەروەها ئێستا کاتەکەی درەنگە بۆ خستنە بازاڕی بەرهەمی هەنار وەک نەبەز عەبدولحەمید دەڵێت "دەبوایە زووتر داواکاری پێشکەش بکردایە، قائیمقامی هەولێر هۆکارێکی دیکەی بۆ ئەوە گەڕاندەوە، کە تێبینیان لەسەر  بەرهەمەکانی فێستیڤاڵی ساڵی رابردوو هەبووە ئەو تێبینییانەش لەلایەن سەردانیکەرانەوە ئاڕاستەیان کراوە".

ئا: ئارام کاکەخان