باڵیۆزی ئەمەریکا کاردانەوەی بەرامبەر بە هەڕەشەکانی ئێران بۆ سەر هەرێمی کوردستان نیشاندا
K24 – هەولێر
ئێلێنا رۆمانۆوسكى، باڵیۆزی ویلایەتە یەکگرتووەکانی ئەمەریکا لە عێراق، لەبارەی هێرشەکانی سوپای پاسدارانی ئێران بۆ سەر چەند ناوچەیەکی هەرێمی کوردستان و هەڕەشەکانی ئەمدواییە قسەی کرد و گوتی: زۆر بەوردی ئاگاداری دۆخەکەین.
ئەمڕۆ (چوارشەممە 2ـی تشرینی دووەم)، دووەم رۆژی دیداری مێری بەڕێوەچوو و ئێلێنا رۆمانۆوسكى، باڵیۆزی ئەمەریکا لە پانێلێکدا قسەی کرد.
دیدارەکە لە ژێر ناوی "عێراق بۆ هەمووان" بەڕێوەدەچێت و رەوشی ئێستا و داهاتووی عێراق، قسەی لەبارەیەوە کرا.
لەو پانێلەی کە باڵیۆزی ئەمەریکا تێیدا قسەی دەکرد، یەکێک لە بەشداربووان لەبارەی هێرشەکانی ئەمدواییەی سوپای پاسدارانی ئێران بۆ سەر کۆیە، زەرگوێزی سلێمانی و پردێ و هەڕەشەکانی ئەمدواییەی ئێران و هەڵوێستی ئەمەریکا بەرامبەریان، پرسیاری لە ئێلێنا رۆمانۆوسكى کرد.
رۆمانۆوسكى لە وەڵامدا گوتی: ئێمە نەک تەنها لە هەرێمی کوردستان، بەڵکو لە عێراق و تەواوی ناوچەکەدا هێرشەکانی ئێرانمان سەرکۆنەکردووە.
باڵیۆزی ئەمەریکا لە عێراق دەڵێت: ئێمە لەو هەڕەشانە زۆر نیگەرانین و لە رێگەی دیپلۆماسی و سەربازییەوە لێرە [هەرێمی کوردستان] و لە عێراق لەگەڵ هاوبەشەکانمان کار دەکەین، ئێمە زۆر بەوردی ئاگاداری دۆخەکەین.
رۆژی یەکی تشرینی دووەم، رۆژنامەی وۆڵ ستریت جۆڕنال لەسەر زاری چەند بەرپرسێکی سعودی ئاشکرایکرد، ئێران هەڕەشەی هێرشکردنەسەر سعودیا و هەولێری کردووە.
هاوکات وتەبێژێک بە ناوی کۆشکی سپییەوە، لەگەڵ ئاماژەدان بەو هەڕەشانە دووپاتیکردووەتەوە، "بۆ پشتگیری لە هاوبەشەکانمان لە ناوچەکەدا و بەبێ دوودڵی، کاردانەوەمان دەبێت".