یۆنان ژمارەیەک زەمالەى خوێندن بۆ زانکۆکانى کوردستان ته‌رخانده‌كات
K24 – هه‌ولێر:
وڵاتی یۆنان بریاریداوه ژماره‌یه‌ك زه‌ماله‌ی خوێندنی باڵا (ماسته‌ر و دكتۆرا)، بۆ زانكۆكانی هه‌رێمی كوردستان ته‌رخانبكات.
ئه‌مڕۆ سێشه‌ممه (8ی تشرینی دووه‌م/نۆڤێمبه‌ری 2022)، له‌میانی كۆبوونه‌وه‌ی وه‌زیری خوێندنی باڵا و توێژینه‌وه‌ی زانستی له‌گه‌ڵ كونسوڵی گشتی یۆنان له هه‌رێمی كوردستان، جەخت لەسەر هەماهەنگى و ئاڵوگۆڕى زانستى، ئەکادیمى و پەرەپێدانى تواناكان له‌نێوان زانکۆ و دامەزراوەکانى هه‌رێمی كوردستان و یۆنان كرا.
لەلایەن خۆیەوە ستاڤرۆس کێریمیس، کونسوڵى گشتى یۆنان لە هەرێمى کوردستان دووپاتیکردەوە، مەبەستیانە بناغەى پەیوەندییەکى بەهێزى زانستى و ئەکادیمى لەگەڵ وەزارەتى خوێندنى باڵا و توێژینه‌وه‌ی هه‌رێمی كوردستان دابڕێژین، لەبوارى خوێندن و هەماهەنگى، بۆ ئەوەش پلانى وڵاتەکەى لەو چوارچێوەیەدا خستەڕوو.
لە دیدارەکەدا دابینكردنی ژمارەیەک زه‌ماله‌ی خوێندن بۆ فێرخوازانى هەرێمى کوردستان لەلایەن وڵاتى یۆنان گفتوگۆى لەبارەوە کرا بەتایبەت ئەو پسپۆڕى و بوارانەى پێویستى هەرێمى کوردستانە، کە ئەمەش دواى سەردانى شاندی وه‌زاره‌تی خوێندنى باڵاى هەرێم دێت بۆ ئەو وڵاتە و واژووكردنی یاداشتی لێكتێگه‌یشتنی هاوبەش بۆ پەرەپێدان و ئاڵوگۆڕى زانستى و ئەکادیمى لەنێوان هەردوولا.
لەو چوارچێوەیەشدا بڕیاردرا دواى داڕشتنەوەى مەرج و رێنماییەکان، وردەکارى زەمالەکە ئاشكرابكرێت بۆ ئەوەى فێرخوازان بەبێ جیاوازى مافى پێشکەشکردنیان هەبێت.