ئەجندای سەردانەکەی سوودانی بۆ تاران ئاشکرا دەکرێت

محه‌ممه‌د شیاع سوودانی، سه‌رۆكی حكومه‌تی عێراقی ئیتیحادی
محه‌ممه‌د شیاع سوودانی، سه‌رۆكی حكومه‌تی عێراقی ئیتیحادی

K24 – هەولێر

یاریدەدەرێکی سەرۆککۆماری ئێران ئەجندای سەردانەکەی سەرۆکوەزیرانی عێراق بۆ تاران ئاشکرا دەکات.

محەممەد جەمشیدی، یاریدەدەری کاروباری سیاسی لە نووسینگەی سەرۆک کۆماری ئێران رایگەیاند، محەممەد شیاع سوودانی سەرۆکوەزیرانی عێراق سبەی سێشەممە 29/11/2022، بە سەرۆکایەتی شاندێکی سیاسیی و ئابووری بە سەردانێکی یەک رۆژە دەگاتە تاران، مەبەستی سەردانەکەش پەرەپێدانی پەیوەندییەکان و فراوانکردنی هاوکارییەکانی نێوان ئێران و عێراقە.

جەمشیدی ئاماژەیداوە، ئیبراهیم رەیسی سەرۆککۆماری ئێران لە کۆمەڵگەی مێژوویی رۆشنبیری سەعدئاباد بە فەرمی پێشوازی سوودانی دەکات و لێگەیشتننامەیەکی تایبەت بە فراوانکردنی هاوکارییەکانی نێوان هەردوو وڵات واژۆ دەکەن.

محەمەد شیاع سوودانی، دوای سەردانەکانی بۆ ئوردن و کوەیت، ئەمە سێیەم سەردانی دەبێت بۆ دەرەوەی عێراق لەوەتەی لە 27ی مانگی رابردوو وەک سەرۆکوەزیرانی عێراق دەستبەکاربووە.