لە سلێمانی کامێرایەکی تۆمارکردنی تیژڕەوی شکێنرا

K24 - سلێمانی:

لە سلێمانی جارێکی دیکە کامێرای تۆمارکردنی تیژڕەوی شکێنرا و تا ئێستا هۆکارەکەی ئاشکرا نەبووە.

ئارام بەختیار، پەیامنێری کوردستان24 لە شوێنی رووداوەکە ئاماژەی بەوەکرد، کامێرای تۆمارکردنی تیژڕەوی لە نزیک پردی کۆبانێ لە شەقامی 60 مەتری سلێمانی شکێنراوە و پێدەچێت گولـلەی بەرکەوتبێت.

گوتیشی، "تا ئێستا هێزە ئەمنییەکان هیچ روونکردنەوەیەکیان لەسەر هۆکاری رووداوەکە و بکەرەکانی ئاشکرا نەکردووە".

ئەوە سێیەمجارە کامێرای دیاریکردنی تیژڕەوی لە نزیک پردی کۆبانێ تێکدەدرێت، پێشتر دووجار شێوێنراوە و بۆیاغکراوە.

لە ئابی ساڵی 2021، هێزە ئەمنییەکان کەسێکیان بە تۆمەتی  شێواندنی کـامێرای هاتووچۆی نزیک پردی کۆبانێ دەستگیرکرد.

بە گوتەی پۆلیس، "تۆمەتبارەکە ھۆکاری شێواندنی کامێراکەی بۆ ئەوە گەڕاندبووە چەندینجار سەرپێچى تیژڕەوى کردووە و وێنەی گیراوە".

 لە ماوەی رابردووشدا چەند جارێکی تەقە لە کامێراکانی تۆمارکردنی تیژڕەوی پۆینت تو پۆینت (خاڵ بۆ خاڵ) لە سەر رێگای سلێمانی دوکان کرا کە لەلایەن کۆمپانیایەکی کەرتی تایبەتەوە جێبەجێدەکرێت.