نێچیرڤان بارزانی ستایشی هاوكارییە سەربازی و مرۆییيەكانی ئەڵمانیا ده‌كات
K24 - هەولێر:
سه‌رۆكی هه‌رێمی كوردستان، پێشوازی لە شاندێكی وەزارەتی دەرەوەی ئەڵمانیا كرد و له میانه‌ی دیدارێكدا پەیوەندییەكانی ئەڵمانیا لەگەڵ عێراق و هەرێمی كوردستان، دۆخی ناوچەكە بەگشتی، تاووتوێكران.
ماڵپه‌ری سه‌رۆكایه‌تی هه‌رێمی كوردستان ئه‌مڕۆ 7ـی تشرینی یه‌كه‌م/دیسێمبه‌ری 2022، راگه‌یه‌ندراوێكی بڵاوكرده‌وه، تێیدا هاتووه: نێچیرڤان بارزانی، سەرۆكی هەرێمی كوردستان، پێشوازی لە تۆبياس تونكێل بەرپرسی دۆسیەی رۆژهەڵاتی ناوەڕاست لە وەزارەتی دەرەوەی ئەڵمانیا و شاندێكی یاوەری كرد كە باڵیۆزی ئەڵمانیا لە بەغدا و كونسولی گشتییان لە هەرێمی كوردستان یاوەری بوون.
لە كۆبوونه‌وه‌يه‌كدا پەیوەندییەكانی ئەڵمانیا لەگەڵ عێراق و هەرێمی كوردستان، دۆخی ناوچەكە بەگشتی، پەیوەندییەكانی هەولێر ـ بەغدا، پەیوەندییەكانی عێراق و هەرێمی كوردستان لەگەڵ وڵاتانی دراوسێ، خرانەی بەر باس و گفتوگۆ.
نێچیرڤان بارزانی سوپاسی هاوكارییە سەربازی و مرۆییيەكانی ئەڵمانیاى بۆ هەرێمی كوردستان لە شەڕی دژی تیرۆردا كرد و پوختەیەكی دەربارەی دوا سەردانی بۆ بەغدا و دیدار و كۆبوونەوەكانی لەگەڵ بەرپرسانی باڵای عێراق خستە ڕوو.
تۆبياس تونكێل باسی لە ئامانج و به‌رنامه‌ى سەردانەكەی بۆ هەرێمی كوردستان و ناوچەكە كرد و ویستی وڵاتەكەی لە بەردەوامیی هاوكارى و پشتگيرى بۆ عێراق و هەرێمی كوردستان و چارەسەركردنی كێشە هەڵواسراوەكانی هەولێر ـ بەغدا، نیشاندا.
دۆخی ئەمنیی ناوچەكە بە گشتی، دۆخی ئاوارە و پەنابەران و ڕەخساندنی زەمینە بەمەبەستی گەڕانەوەیان بۆ زێدی خۆیان و جێبەجێكردنی رێككەوتنی شەنگال، لایەنێكی دیكەی دیدارەكە بوو، كه تيايدا جه‌خت له به‌رده‌واميى يارمه‌تيى مرۆييى ئه‌ڵمانيا بۆ ئاواره و په‌نابه‌ران دووپاتكرايه‌وه.