فراكسیۆنی پارتی له په‌رله‌مانی عێراق په‌یامێكی پیرۆزبایی ئاراسته‌ی ئێزدییه‌كان ده‌كات
K24 – هه‌ولێر:
فراكسیۆنی پارتی له په‌رله‌مانی عێراق، به‌بۆنه‌ی جه‌ژنی (رۆژوو)ـی ئێزدییه‌كان، په‌یامێكی پیرۆزبایی بڵاوكرده‌وه.
ئه‌مڕۆ (هه‌ینی 16ـی كانوونی یه‌كه‌م/دیسێمبه‌ری 2022)، فراكسیۆنی پارتی دیموكراتی كوردستان له په‌رله‌مانی عێراق، په‌یامێكی پیرۆزبایی بڵاوكرده‌وه، تێیدا هاتووه: به‌بۆنه‌ی جه‌ژنی (رۆژوو)ـی ئێزدییه‌كان، به‌ناوی ڤیان سه‌بری سه‌رۆكی فراكسیۆنی پارتی و ته‌واوی ئه‌ندامانی فراكسیۆن، پیرۆزبایی له خوشك و برایانی ئێزدی له هه‌رێمی كوردستان، عێراق و جیهان ده‌كه‌ین.
فراكسیۆنی پارتی له په‌رله‌مانی عێراق دووپاتی گه‌ڕانه‌وه‌ی ته‌واوی ئاواره ئێزدییه‌كانیی بۆ ناوچه‌كانیان كرده‌وه، وێڕای قه‌ره‌بووكردنه‌وه‌یان و ئاوه‌د‌انكردنه‌وه‌ی ناوچه‌كانییان.
داواشیكرد هه‌وڵی زیاتر بۆ گه‌ڕان و رزگاركردنی رفێندراوانی دیكه‌ی ئێزدی له‌سه‌ر ئاستی ناوخۆیی و نێوده‌وڵه‌تی بدرێت، كه له‌لایه‌ن چه‌كدارانی داعش رفێندراون.
ئێزدییه‌كان هه‌موو ساڵێك جه‌ژنى رۆژوو ده‌كه‌نه‌وه، كه ناسراوه به جه‌ژنى(رۆژوو - ئێزى)، تێیدا پێش جه‌ژنه‌كه سێ رۆژ به‌ڕۆژوو ده‌بن، له‌نێویشیدا رێوڕه‌سمى كۆمه‌ڵایه‌تى به‌ڕێوه‌ده‌چێت و پیرۆزبایی له‌یه‌كترده‌كه‌ن و ئاشتبوونه‌وه له‌نێوان دابڕاوه‌كان ده‌كرێت و خواردنى تایبه‌ت ئاماده‌ده‌كرێت، جیا له سه‌ردانكردنى گۆڕستانه‌كان و پاڕانه‌وه له‌پێناو ئاشتى وخۆشه‌ویستى له جیهاندا.