سەرۆک بارزانی پێشوازی لە کونسوڵی گشتیی ئەڵمانیا لە هەولێر دەکات

"بیروڕا لەبارەی بارودۆخی سیاسیی ناوچەکە بە گشتی و عێراق بەتایبەتی ئاڵوگۆڕ کران"

K24 - هەولێر

سەرۆک مسعود بارزانی، پێشوازی لە کلاوس شترایشەر کونسوڵی گشتیی ئەڵمانیا لە هەولێر کرد و، لەبارەی بارودۆخی سیاسیی ناوچەکە بە گشتی و عێراق بە تایبەتی بیروڕایان ئاڵوگۆڕکرد.

لەو دیدارەکەدا کە رۆژی سێشەممە ٢٠ـی کانوونی یەکەمی ٢٠٢٢ لە سەلاحەددین بەڕێوەچوو، بیروڕا لەبارەی بارودۆخی سیاسیی ناوچەکە بە گشتی و عێراق بەتایبەتی ئاڵوگۆڕ کران، و رۆشنایی خرایە سەر پەیوەندییەکانی نێوان هەرێمی کوردستان و بەغدا و بەرنامەی کاری حکومەتی تازەی عێراق.

هەر لەو دیدارەدا جەخت لە جێبەجێکردنی رێککەوتننامەی نێوان حکومەتی فیدڕاڵی عێراق و حکومەتی هەرێمی کوردستان لەبارەی شنگال کرایەوە، ئەویش بۆ گەڕاندنەوەی سەقامگیری بۆ دەڤەری شنگال و کۆتاییهاتنی بارودۆخی ئاوارەیی خەڵکی شنگال و گەڕانەوەیان بۆ زێدی باب و باپیرانیان.

هەڕەشەکانی تیرۆر تەوەرێکی دیکەی ئەو کۆبوونەوەیە بوو و کونسوڵی ئەڵمانیا لە هەولێر ئەوەی دووپاتکردەوە کە وڵاتەکەی لە شەڕی تیرۆردا بە هاوبەش و پشتیوانی هەرێمی کوردستان و عێراق دەمێنێتەوە و، سەقامگیری و پێشکەوتنی هەرێمی کوردستان بەلای ئەلمانیاوە بایەخی تایبەتی هەیە.

هەر لەو دیدارەدا سەرۆک بارزانی سوپاسی حکومەت و گەلی ئەڵمانیای کرد کە لە شەڕی دژی تیرۆردا یارمەتی گەلی کوردستانیان داوە و، پەیوەندییەکانی نێوان گەلی کوردستان و گەلی ئەڵمانیای بە مێژوویی و دۆستانە وەسف کرد.