کۆمپانیایەکی ئەمەریکی 18 هەزار کارمەند لە کارەکانیان دووردەخاتەوە
K24 - هەولێر:
کۆمپانیای ئەمازۆنی ئەمەریکی بڵاویکردەوە، لە چوارچێوەی رێکارەکانی رووبەرووبوونەوەی ناجێگری ئابووری کۆمپانیاکە 18 هەزار کارمەند لە کارەکانیان دووردەخەنەوە.
کۆمپانیای ئەمازۆن باسی لەوەشکرد، هەست بەوەدەکەن دوورخستنەوەی ئەو کارمەندانە قورسە و کاریگەری زۆری لەسەریان دەبێت، بەڵام ئەو بڕیارەیان لەناچاریدا دەرکردووە و هەوڵدەدەن ئەو کارمەندانەی دوور دەخرێنەوە بەپێدانی چەند موچەیەک قەرەبوویان بکەنەوە.
ئەمازۆن ئاماژەی بەوەشدا، پڕۆسەی دوورخستنەوەی کارمەندەکان لە 18 ی ئەم مانگەوە دەستپێدەکات و بەشێک لە کارمەندە دوورخراوەکان لە کیشوەری ئەوروپا دەبن.
ئەمە لەکاتێکدایە، کۆمپانیای ئەمازۆن لە مانگی 11ی ساڵی رابردووش زیاتر لە 10 هەزار کارمەندی بەهۆی قەیرانی داراییەوە لە کارەکانیان دوورخستەوە.