دوو ئەندامی گرووپێکی شاخەوانی بەر مین کەوتن

رووداوەکە لە سنووری رواندز روویداوە
وێنەی بریندارەکان
وێنەی بریندارەکان

K24 - هەولێر:

ئەمڕۆ لە شاخی گۆرنۆک لە سنووری قەزای رواندز دوو هاووڵاتی بەر مین کەوتن و لە ئاکامدا هەردووکیان بەرێژەی جیاواز برینداربوون.

بەڕێوەبەرایەتی بەرگری شارستانی سۆران لەو بارەیەوە رایگەیاند، ئەمرۆ هەینى 13/ 1/ 2023 کاتژمێر(13:00) دوو هاووڵاتى کە ئەندامی گرووپێکی شاخەوانى بوون لە شاخى گۆرنۆک/بێخاڵ سەر بە قەزاى رواندز بەر مین کەوتن.

ئاماژە بەوەشدرا، دواى ئاگادارکردنەوەی بەرگری شارستانی سۆران دەستبەجێ تیمى ئامادەباشى بنکەى بەرگرى شارستانى رواندز دەرچوو بۆ شوێنى رووداوەکە و بە هاوکارى پۆلیسى خۆجێیی و تیمى تەندروستى، هەردوو هاووڵاتیەکە گواسترانەوە بۆ نەخۆشخانەى رواندز.

بەپێى راپۆرتى تیمەکانی بەرگری شارستانی، برینداری یەکەم هاووڵاتیەکە بەناوی (م م هـ) کە لەدایکبووى 1998 دانیشتووى رواندزە و کەللـە سەرى بریندارە و بارى تەندروستى جێگیرە چارەسەرى پێویستى بۆ کراوە.

سەبارەت بە برینداری دووەم، بەرگری شارستانی سۆران ئەوەی خستەڕوو، ئەوەى دیکەیان ناوى (د خ ع)ـیە لەدایکبووى 1991ـەو خێزاندارە، دانیشتووى رواندزە و فەرمانبەری فەرمانگەى کارەباى رواندەزە، بەهۆى ئەوەى ناوبراو پێى لەسەر مینەکە داناوە قاچێکى لەدەستداوە.

بە گوێرەی راگەیەندراوەکەی بەرگری شارستانی سۆران، بەهۆى سەختى برینەکەى لە نەخۆشخانەى رواندزەوە دەگوازرێتەوە بۆ نەخۆشخانەى ئاشتى لە سۆران.

بەرگری شارستانی سۆران هۆکارى رووداوەکە بۆ ئەوە دەگەڕێنێتەوە، کە دوو هاووڵاتییەکە لە رێگاى سەرەکى پیادەرۆیى لایان داوە.