له ئه‌عزاز چه‌ند تۆپێك ئاراسته‌ی بنكه‌یه‌كی سه‌ربازی توركیا كران
K24 – هه‌ولێر:
دوو پۆلیسی چالاكییه مه‌ده‌نییه‌كان بریندار بوون، به هۆی به‌ركه‌وتنی پارچه‌ی ئه‌و تۆپانه‌ی له نزیك بنكه‌یه‌كی سه‌ربازی سوپای توركیا له شاری "ئه‌عزاز"ی باكووری حه‌له‌ب كه‌وتنه خواره‌وه.
روانگه‌ی سووریا بۆ مافی مرۆڤ، رایگه‌یاند، سه‌رچاوه‌ی ئه‌و تۆپانه، سنووری بڵاوبوونه‌وه‌ی هێزه كوردییه‌كان و سوپای سووریایه له ریفی باكووری حه‌له‌ب.
له به‌رامبه‌ریشدا، سوپای توركیا زیاتر له (20) گولـله تۆپ و مووشه‌كی ئاراسته‌ی ده‌وروبه‌ری گوندی "ئابین" له ناحیه‌ی "شیراوا"و ناوچه‌كانی دیكه‌ی ریفی عه‌فرین و باكووری خۆرئاوای پارێزگای حه‌له‌ب كرد.
ناو به‌ناو هێزه ناكۆكه‌كانی سووریا، له ده‌وروبه‌ری عه‌فرین و ئه‌عزاز و ناوچه‌كانی باكووری حه‌له‌ب په‌لاماری یه‌كدی ده‌ده‌ن و بۆ ماوه‌ی كاتی رووبه‌ڕووبوونه‌وه له نێوانیاندا رووده‌دات.