سەرۆک بارزانی پێشوازی لە فەرماندەی هێزەکانی هاوپەیمانان لە عێراق و سووریا دەکات
K24 – هه‌ولێر:
ئه‌مڕۆ دووشەممە (30ـی کانوونی دووەم/یه‌نایری 2023)، لە سەلاحەددین سەرۆک مەسعود بارزانی پێشوازی لە جەنەڕاڵ مەکفارلێن، فەرماندەی هێزەکانی هاوپەیمانان لە عێراق و سووریا بۆ شەڕی دژی داعش و شاندێکی یاوەری کرد.
لە دیدارەکەدا بارودۆخی مەیدانیی شەڕی دژی تیرۆریستانی داعش تاوتوێ کرا و جەخت لەوە کرایەوە کە تیرۆر مەترسییەکی بەردەوامە و هەتا ڕیشەکێشکردنی تیرۆر و هزری توندڕۆیی پێویستە کۆمەڵگەی نێودەوڵەتی و هاوپەیمانان و وڵاتانی ناوچەکە لەگەڵ یەکتر لە هەوڵ و هەماهەنگیی بەردەوامدا بن.
هەر لەو دیدارەدا شاندی میوان ستاییشی ڕۆڵی هێزی پێشمەرگەی کوردستانی کرد و بە هێزێکی تۆکمە و خاوەن ورەی وسف کرد و ئەوەشی ڕاگەیاند کە هاوپەیمانان خوازیاری ئەوەن پێشمەرگە بە نەفەسێکی تازە و دامەزراوەیی ڕێک بخرێتەوە.
لەو کۆبوونەوەیەدا سەرۆک بارزانی سوپاسی هاوکاری و هەماهەنگیی هاوپەیمانانی کرد لەگەڵ هێزی پێشمەرگە لە شەڕی دژی تیرۆریستاندا و هێماشی بەوەدا کە هێزی پێشمەرگەی کوردستان قوربانیەکی زۆری داوە بەڵام دواجار هەمیشە لە خەبات و تێکۆشانیدا سەرکەوتنی بەدەست هێناوه، چونکە خاوەنی ئیرادەی خۆی و بەدوای دۆزێکی رەوا بووە و پێویستە ئەوە بەردەوام بێت و لەمەودواش هێزی پێشمەرگە بە گیانی نیشتیمانپەروەری و ئیرادە و بیروباوەڕەوە پەروەردە بکرێت و بەهێز بکرێت.
