بەرهەمی ماسی هه‌رێمی کوردستان هەناردەی ناوچەکانی عێراق و وڵاتانی کەنداو دەکرێت
K24 - هه‌ولێر:
گـەورەترین پڕۆژەی بەرهەمی ماسی لە هەرێمی کوردستان و عێراق لە پارێزگای دهۆک دروستدەکرێت و 65٪ـی كارەكانی تەواو بووە.
ئه‌مڕۆ سێشه‌ممه (31ـی كانوونی دووه‌م/یه‌نایه‌ری 2023)، فه‌رمانگه‌ی میدیا و زانیاریی حكومه‌تی هه‌رێمی كوردستان بڵاویكرده‌وه، بایەخدان و بەرەوپێشبردنی زیاتر بە بەرهەمهێنان، یەكێكە لە پلانە ستراتیژییەکانی كابینەی نۆیەمی حكومەتی هەرێمی كوردستان، لەو چوارچێوەیەشدا گەورەترین پڕۆژەی بەرهەمی ماسی لە هەرێمی کوردستان و عێراق لە پارێزگای دهۆک دروستدەکرێت و 65٪ـی كارەكانی تەواوبووە.
به‌گوێره‌ی بڵاوكراوه‌كه‌ی فه‌رمانگه‌ی میدیا و زانیاریی حكومه‌تی هه‌رێمی كوردستان ئاماژه‌ی به‌وه‌داوه، ئامانج لە دروستکردنی پڕۆژه‌كه، پڕكردنەوەی پێویستی ناوخۆ و پەرەپێدانیەتی بۆ ئاستێك بتوانرێت هەناردەی دەرەوە بكرێت، کە لە قۆناغی یەكەمیدا دەتوانێت لە ساڵێکدا 21 ملیۆن پەنجە ماسی و هەزار و 200 تۆن گۆشتی ماسی بەرهەم بهێنێت.
له‌لایه‌ن خۆیه‌وه شوکری عومەر، بەڕێوەبەری پڕۆژەی بەرهەمی ماسی، بە پێگەی فەرمیی حكومەتی هەرێمی کوردستانی راگەیاندووه، "ئەم پڕۆژەیە، یەکێکە لە پڕۆژە ستراتیژییەکان و تەواوکاری بەرهەمی کشتوکاڵییە لە هەرێمی کوردستان، سەرمایەکەی 10 ملیۆن دۆلارە، لەئێستادا 500 دەرفەتی کاری بەشێوەی راستەوخۆ و ناڕاستەوخۆ بۆ هاووڵاتییان ڕەخساندووە".
بەڕێوەبەری پڕۆژەكە، ئاماژه‌ی به‌وه‌شكردووه، هیچ جۆرە پرۆژەیەکی بەرهەمی ماسی لە تەواوی هەرێمی کوردستان و عێراق، بەو شێوەیە و بەو جۆرە سیستەمە دروست نەکراوە، هەروەها تەکنەلۆژیایەکی پێشکەوتووشی تێدا بەکارهێندراوە".
رووبەری پڕۆژەکە 229 دۆنمە و پێکدێت لە هەڵهێنەری ماسی، تاقیگە، حەوزی خۆڵ و قەفەزی ماسی، پلانیش هەیە کارگەیەکی بەرهەمهێنانی ئالیک دابنرێت و دوای پڕکردنەوەی پێویستی ناوخۆ، لە ئاییندەدا بەرهەمی ئەم پرۆژەیە هەناردەی بازاڕەکانی عێراق و وڵاتانی کەنداو بکرێت.