باڵيۆزى به‌ريتانيا بۆ نێچیرڤان بارزانی: به‌ریتانیا پێشوازى له‌ ‏كۆبوونه‌وه‌ى پارتى و يه‌كێتی ده‌كات

نێچيرڤان بارزان له‌گه‌ڵ باڵيۆزى به‌ريتانيا له‌ عێراق كۆبووه‌وه‌‏ | وێنه‌: سه‌رۆكایه‌تی هه‌رێمی كوردستان
نێچيرڤان بارزان له‌گه‌ڵ باڵيۆزى به‌ريتانيا له‌ عێراق كۆبووه‌وه‌‏ | وێنه‌: سه‌رۆكایه‌تی هه‌رێمی كوردستان

K24 - هه‌ولێر:

نێچيرڤان بارزانى، سه‌رۆكی هه‌رێمی كوردستان له‌ هه‌ولێر له‌گه‌ڵ باڵيۆزى به‌ريتانيا له‌ عێراق كۆبووه‌وه‌‏ و به‌گوێره‌ی راگه‌یه‌ندراوی سه‌رۆكایه‌تی هه‌رێمی كوردستان، له‌ كۆبوونه‌وه‌كه‌دا باڵیۆزی به‌ریتانیا پێشوازی له‌ كۆبوونه‌وه‌ی ئه‌م دواییه‌ی پارتی و یه‌كێتی له‌ شاری سلێمانی كردووه‌. 

ئه‌مڕۆ چوارشه‌ممه‌ (1ـی شوبات/ فێبرایه‌ری 2023)، سه‌رۆكایه‌تی هه‌رێمی كوردستان له‌ راگه‌یه‌ندراوێكدا ئاماژه‌ی به‌وه‌كرد، به‌یانی ئه‌مڕۆ چوارشه‌ممه‌ نێچيرڤان بارزانى، سه‌رۆكى هه‌رێمى ‏كوردستان پێشوازى له‌ مايك برايسۆن ريچاردسۆن، باڵيۆزى به‌ريتانيا له‌ ‏عێراق كرد.‏

به‌گوێره‌ی راگه‌یه‌ندراوه‌كه‌ی سه‌رۆكایه‌تی هه‌رێمی كوردستان، له‌ كۆبوونه‌وه‌يه‌كدا هه‌ردوولا جه‌ختيان له‌ برده‌وان به‌ په‌يوه‌ندييه‌كانى عێراق و ‏هه‌رێمى كوردستان له‌گه‌ڵ به‌ريتانيا كردووه‌ته‌وه‌ و دوايين پێشهاته‌كانى دۆخى سياسيى ‏عێراق، په‌يوه‌ندييه‌كانى هه‌ولێر ـ به‌غدا و پێشهاته‌كانى ناوچه‌كه‌يان به‌گشتى تاوتوێ ‏كردووه‌.‏

دیمه‌نێكی نێو كۆبوونه‌وه‌كه‌ | وێنه‌: سه‌رۆكایه‌تی هه‌رێمی كوردستان
دیمه‌نێكی نێو كۆبوونه‌وه‌كه‌ | وێنه‌: سه‌رۆكایه‌تی هه‌رێمی كوردستان

له‌باره‌ى دۆخى ناوخۆى هه‌رێمى كوردستانه‌وه‌، سه‌رۆكایه‌تی هه‌رێمی كوردستان ئه‌وه‌ی خستووه‌ته‌ڕوو، باڵيۆزى به‌ريتانيا پێشوازى له‌ ‏كۆبوونه‌وه‌ى ئه‌م دواییه‌ی پارتى ديموكراتى كوردستان و يه‌كێتيى نيشتمانيى كوردستان كردووه‌ و"‏پشتگيريى وڵاته‌كه‌ى بۆ گفتوگۆى هه‌ردوولا و چاره‌سه‌ركردنى كێشه‌كان به‌ گفتوگۆ ‏ده‌ربڕىوه‌". ‏

له‌ كۆتایی راگه‌یه‌ندراوه‌كه‌دا هاتووه‌: له‌لايه‌كى ديكه‌وه‌ پرسى ياساكانى نه‌وت و گاز و بودجه‌ى عێراق و بڕياره‌كانى ‏دادگاى باڵاى فيدراڵى و كاريگه‌ريى نه‌رێنييان له‌سه‌ر كه‌شى سياسيى وڵات خسته‌ ‏به‌ر باس. له‌مباره‌يه‌وه‌ به‌ڕێز باڵيۆزى به‌ريتانيا دووپاتى كردوه‌ كه‌ وڵاته‌كه‌ى هه‌ولێر ‏و به‌غدا هان ده‌دات بۆ ئه‌وه‌ى به‌ گفتوگۆ كێشه‌كانيان چاره‌سه‌ر بكه‌ن.