مه‌سرور بارزانی: حكومه‌تی هه‌رێمی كوردستان ئاماده‌یه بۆ هه‌موو هاوكارییه‌ك
K24 - هه‌ولێر:
مه‌سرور بارزانی، سه‌رۆكی حكومه‌تی هه‌رێمی كوردستان په‌یامێكی له‌باره‌ی بوومه‌له‌رزه‌كه‌ی به‌یانی ئه‌مڕۆی توركیا و باكووری كوردستان بڵاوكردوه.
ئه‌مڕۆ دووشه‌ممه (6ـی شوبات/فێبرایه‌ری 2023)، مه‌سرور بارزانی، سه‌رۆكی حكومه‌تی هه‌رێمی كوردستان له تویتێكدا ئاماژه‌ی به‌وه‌كردووه، حکومەتی هەرێمی کوردستان ئامادەیە بۆ یارمەتیدانی هەوڵەکانی ڕزگارکردن و بەهاناوەچوونی زیانلێکەوتووان.
مه‌سرور بارزانی ده‌شڵێت: هاوخه‌مم لەگەڵ کەسوکاری قوربانی و بریندارەکانی ئەو بومەلەرزەیەی ناوچه‌كه‌مانی هه‌ژاند.
بەرە بەیانی ئەمڕۆ دووشەممە 6ـی شوباتی 2023، بومەلەرزەیەک بە گوڕی 7.8 پلەی رێختەر 10 شاری تورکیا و باکووری کوردستانی هەژاند، دواتریش نزیکەی 50 پاشلەرزە روویاندا، کە بەهۆیانەوە زیاتر لە 70 کەس لەو شارانە گیانیان لەدەستدا و سەدان کەسی دیکەش برینداربوون.
بومەلەرزەی سەرەتا لە هەردوو پارێزگای دهۆک و هەولێر هەستی پێکرا و، بەشێك لە هاووڵاتیان لەترسی دووبارەبوونەوەی بومەلەرزە لە ماڵەکانیان چوونە دەرەوە.
زنجیرە بومەلەرزەکەی تورکیا و باکووری کوردستان، باکووری سووریاشی گرتەوە، وەزارەتی تەندروستی سووریا لەوبارەیەوە رایگەیاند، لانیکەم 111 کەس لە ناوچەکانی ژێر دەسەڵاتی حکومەت لە سووریا گیانیان لەدەستداوە.